ताजा अपडेट
बैद्यनाथ धाम पर्यटन प्रवर्द्धनका लागि नयाँ पहल : झुलङ्गे पुलमा झण्डा र झिलिमिली सजावट
बैद्यनाथ धाम पर्यटन विकास तथा व्यवस्थापन समितिले बैद्यनाथ धाम–रिडिकोट जोड्ने झुलङ्गे पुललाई पर्यटकीय आकर्षणको केन्द्र बनाउने उद्देश्यले सिंगारिएको छ। हालै सम्पन्न साजसज्जा कार्यपछि यहाँ फोटो खिचाउने तथा टिकटक भिडियो बनाउने युवायुवतीहरूको घुइँचो लाग्न थालेको छ।
पुल भरी दुबै किनार सम्म ९४ हजार रुपैयाँको लागतमा नेपालका राष्ट्रिय झण्डासँगै हिन्दू संस्कृति झल्काउने धार्मिक झण्डाहरू सजाइएको छन्। यसले पुलमा आस्थाको रंग थपेको छ भने, सौन्दर्यले पर्यटकको मन लोभ्याएको छ। पुलमा आधी झण्डा लगाउने कार्य सम्पन्न भए पनि आधी झण्डा लगाउन बाँकी रहेको वैद्यनाथ धाम पर्यटन विकास तथा व्यवस्थापन समितिका कार्यकारी भरत कुँवरले बताए।
वैद्यनाथ धाम पर्यटन विकास तथा व्यवस्थापन समितिका अध्यक्ष गोकुल भाट र कार्यकारी भरत कुँवरको अगुवाइमा गरिएको उक्त पहल स्थानीय स्तरमै पर्यटन प्रवर्द्धनको उदाहरणीय अभ्यास बनेको छ। उनीहरूले स्थानीय स्रोत, संस्कृति र सम्भावनालाई उजागर गर्दै गाउँमै रोजगारी सिर्जना गर्ने उद्देश्य राखेर यो कार्यक्रम अघि बढाइएको बताएका छन्।
“हामीले छोटो समयमै ठूलो जनसहभागिता देख्यौं। फोटो, भिडियो र सामाजिक सञ्जालमार्फत यहाँको प्रचार भइरहेको छ, जसले बैद्यनाथ धाम क्षेत्रको पर्यटकीय भविष्य उज्यालो बनाउने आशा गरेका छौं,” अध्यक्ष भाटले बताए।
पुलमा आउने दर्शकहरूबाट सामाजिक सञ्जालमा सकारात्मक प्रतिक्रिया आउन थालेको छ। टिकटक, फेसबुक, इन्स्टाग्राममा पुलसँग जोडिएका दृश्यहरू व्यापक रूपमा साझा भइरहेका छन्। यसले न केवल बैद्यनाथ धामलाई नयाँ पर्यटकीय गन्तव्यको रूपमा चिनाउन सहयोग गरिरहेको छ, स्थानीय होटल तथा पसल व्यवसायमा समेत उत्साह थपेको छ।
पारम्परिक धार्मिक झण्डा र राष्ट्रिय झण्डाको संयोजनले पुललाई धार्मिक तथा राष्ट्रिय एकताको प्रतीक पनि बनाएको छ। यही सन्देश लिएर वैद्यनाथ धाम पर्यटन विकास तथा व्यवस्थापन समितिले आगामी दिनमा अन्य स्थानहरूमा समेत यस्ता प्रचारात्मक अभियान विस्तार गर्ने योजना बनाएको छ।
बैद्यनाथ धाम–रिडिकोट जोड्ने झुलङ्गे पुल अब केवल आवतजावतको बाटो मात्र होइन, पर्यटकीय आकर्षण र सामाजिक संवादको केन्द्र बन्दै गएको छ।
प्रतिक्रिया