Hamro Bulletin

देशभर तीव्र रुपमा फैलिरहेको कोरोनाभाइरस प्रधानमन्त्री निवास बालुवाटारमा पनि फैलिएको छ । बालुवाटार स्थित प्रधानमन्त्रीको सरकारी निवासमा कोरोना फैलिएपछि तरंग उत्पन्न भएको छ भने प्रधानमन्त्री केपी शर्मा ओलीको अवस्थाप्रति सर्वत्र चासो रहेको छ । 

केही महिनाअघि मृगौलाको सफल प्रत्यारोपण गराएका प्रधानमन्त्री ओलीले बालुवाटारमा भेटवार्ता र छलफललाई निरन्तरता दिँदै आएका छन् भने यसअघि देखि नै उनी जोखिममा रहेका थिए । अहिले प्रधानमन्त्रीकै सल्लाहकार र सचिवालयमा कार्यरत कर्मचारी, सुरक्षाकर्मीलगायतका गरी ६ दर्जन बढीमा संक्रमण पुष्टि भएको हो । 

यद्यपि प्रधानमन्त्री ओलीको रिपोर्ट नेगेटिभ देखिएको सचिवालयका एक अधिकारीको दावी छ । 

केही दिनअघि प्रधानमन्त्रीको निजी चिकित्सक दिब्या सिंह शाहमा कोरोना पुष्टि भएपछि बालुवाटारमा कार्यरतहरुको पीसीआर परीक्षण गरिएको थियो । परीक्षणका क्रममा ठूलो संख्यामा कोरोना पोजेटिभ पाइएको हो । 
शुक्रबार स्वाब संकलन पछि गरिएको कोरोना परीक्षणमा प्रमुख राजनीतिक सल्लाहकार विष्णु रिमाल, परराष्ट्र सल्लाहकार राजन भट्टराई, प्रेस सल्लाहकार सूर्य थापाको रिपोर्ट शनिबार पोजेटिभ देखिएको छ ।

उनीहरुले आफूहरुलाई कोरोना पोजेटिभ भएको भन्दै सार्वजनिक जानकारी दिँदै सम्पर्कमा आएकाहरुलाई सर्तक रहन अनुरोध गरेका छन् । केही दिनयता बालुवाटारमा कोरोना भए–नभएको एकिन गर्न अधिकांश सचिवालयका सदस्य, कर्मचारी, चालक, सुरक्षाकर्मी लगायतको स्वाब संकलन गरिएको थियो ।