ताजा अपडेट
नेविसंघका नेता पक्राउ परेपछि अत्तरियामा प्रदर्शन
नेपाल विद्यार्थी संघका नेतालाई प्रहरीले पक्राउ गरेपछि कैलालीको अत्तरियामा प्रदर्शन भएको छ ।
नेविसंघ शंकरदेव क्यम्पसका नेता दिपक ओझालाई प्रहरीले बिनाकारण अपहरण शैलीमा पक्राउ परेको भन्दै कार्यकर्ताहरुले अत्तरियामा प्रदर्शन गरेका हुन् । अत्तरियाबाट पक्राउ परेका ओझालाई रिहा गर्नुपर्ने उनीहरुको माग छ ।
नेविसंघ क्षेत्र नम्बर ४ को आयोजनामा उनीहरुले बिरोध प्रदर्शन गर्दै निशर्त रिहाईको माग गरेका छन् । बिरोध कार्यक्रममा सहभागिहरुले सरकार र प्रहरी बिरुद्ध नाराबाजीसहित पर्दशन गरेका थिए ।
उनीहरुले अत्तरिया बजारबाट र्याली निकाल्दै ईलाका प्रहरी कार्यालय मालाखेती कार्यालयको अगाडी गएर कोण सभामा गरेका थिए ।
कोण सभालाई नेविसंघ क्षेत्र नम्बर ४ का क्षेत्रिय सभापति गणेश शाह, तरुण दल गोदावरी नगर समितिका सभापति शंकर खड्का, युवा नेता पदमराज ओझा, प्रेमराज भट्ट, जगतराम महरा, देवराज ओझा लगाएतले सम्बोधन गरेका थिए । ओझाको रिहाई नगरेसम्म आन्दोलन जारी रहने नेविसंघ क्षेत्र नम्बर ४ का सभापती गणेश शाहले बताए ।
ओझालाई प्रहरीले बुधबार कैलालीको अत्तरियाबाट नियन्त्रणमा लिएको थियो । त्रिवि समाजशास्त्रका उपप्राध्यापक प्रेम चलाउनेमाथि आक्रमण गरी घाइते बनाएको घटनामा ओझा संलग्न भएको भन्दै प्रहरीले उनलाई नियन्त्रणमा लिएको हो ।
उपप्राध्यापक चलाउनेमाथि गत असोज २० गते त्रिवि परिसरभित्रै कुटपिट भएको थियो । घटनामा संलग्न रहेको आरोपमा यसअघि प्रहरीले अन्य केहीलाई पक्राउ गरिसकेको छ ।
प्रतिक्रिया