Hamro Bulletin

धनगढी : लामो समयदेखि धनगढीको मुख्य ६ लेन सडकमै हुँदै आएको ट्यांकर पार्किङ्ग हट्न सकेको छैन । 

नेपाल आयल निगम धनगढीले अलग्गै ट्यांकर पार्किड्ड स्थल बनाएपनि हालसम्म सडकमै पार्किङ्ग हुँदै आएको हो । जसमा ट्राफिक प्रहरी र आयल निगम धनगढी ट्यांकर व्यवस्थापनमा असफल हुँदै आएको छ । अति प्रज्वलनशिल पदार्थ बोक्ने ट्यांकर सडकमै पार्किङ्गले दुर्घटनाको जोखिम यथावतै रहेको हो ।

गत असोज २७ गते सुदूरपश्चिम प्रदेश ट्राफिक प्रहरी कार्यालयका प्रमुख ट्राफिक प्रहरी उपरीक्षक वामदेव गौतमले दिनेश खबरलाई ३ दिनभित्रै व्यवस्थापन गर्ने प्रतिवद्धता जाएका थिए । तर उनको सो प्रतिबद्धता हाल झुठो सावित भएको छ । भने, आयल निगम निरीह देखिएको हो । सडक कब्जा हुने गरी राखिएका ट्याङकरले अस्तव्यस्तता उत्तिकै बढाएको हो ।

अब भने सुदूरपश्चिम प्रदेश ट्राफिक प्रहरी कार्यालयका प्रमुख ट्राफिक प्रहरी उपरीक्षक गौतमले स्थानीयका विरोधले व्यवस्थापन गर्न नसकेको बताउँन थालेका छन् ।

नेपाल आयल निगमले धनगढीले ट्यांकर पार्किङ्गका लागि भन्दै चटकपुरमा जग्गा भाडामा लिएको छ । गत साउनदेखि निगमले जग्गाको भाडा तिर्दै आएको छ । तर ट्यांकर व्यवसायीले भने पार्किङ्गस्थल छोडेर सडकमै पार्किङ्ग गर्ने कार्यलाई निरन्तरगता दिदै आएका हुन् ।

ट्यांकर व्यवसायी संघ सुदूरपश्चिमका अध्यक्ष मनिराम पाण्डेयले आयल निगमले बनाएको पार्किङ्ग स्थलमा स्थानीय अवरोध गरेपछि पार्किङ्ग गर्न नसकेको बताए ।

यता साउनदेखि भाडा तिर्दै आएको आयल निगमले समेत ट्राफिक प्रहरी र ट्यांकर व्यवसायीकै भाषा बोल्ने गरेको छ । नेपाल आयल निगम धनगढीका प्रमुख जीतरन्जन दास भन्छन् ‘पार्किड्ढ त बनायौ, तर स्थानीय आफुहरुको सहमति बेगर ट्यांकर पार्किङ्ग स्थल बनाएको भन्दै स्थानीयले अवरोध गरेपछि बनाइएको पार्किङ्ग स्थल खाली छ ।’

स्थानीयले अवरोध गरेपनि निगमले सोही जग्गाको विगत ४ महिनादेखि मासिक २० हजारका दरले भाडा तिर्दै आएको छ । तर निकास खोज्ने तर्फ भने उदासिनता देखाएको हो ।