Hamro Bulletin

सरकारले आर्थिक वर्ष ०७७/७८ मा कोरोना संक्रमण, रोकथाम तथा उपचार व्यवस्थापनमा ६ अर्ब ८१ करोड ५९ लाख ६ हजार खर्च भएको जनाएको छ। स्वास्थ्य मन्त्रालयको कोरोना ब्रिफिङमा मन्त्रालयका प्रवक्ता डा. जागेश्वर गौतमले यसबारे जानकारी दिएका हुन्।

सबैभन्दा बढी रकम हाइ डिपेन्डेन्सी युनिटका लागि खर्च भएको मन्त्रालयले जनाएको छ। यसमा ३ अर्ब २५ करोड खर्च भएको हो ।

यस्तै प्रयोगशाला परीक्षण तथा व्यवस्थापनमा निकासामा १ अर्ब १२ करोड ४० लाख, संक्रमित व्यवस्थापन, कन्ट्याक्ट ट्रेसिङ, जोखिम भत्तावाफतमा १ अर्ब १४ करोड २९ लाख ६ हजार र  आइसीयू भेन्टिलेटर र अस्पताल सुदृढिकरणमा १ अर्ब २९ करोड ९० लाख निकासा भएको हो।

यस्तै मन्त्रालयले कोरोना परीक्षण र उपचारमा केही संशोधन गरेको छ। नेपाल सरकारले कोरोना परीक्षण र उपचार गर्न सुचिकृत गरेका सरकारी प्रयोगशाला र सरकारी अस्पतालमा कोरोना भाइरस (कोभिड-१९) संक्रमण लक्षण वा चिह्‍न देखिएका बिरामीको परीक्षण र उपचार नि: शुल्क गरिने डा.गौतमले बताए।

तर, उल्लेखित व्यक्तिहरुले कुनै बिमा कम्पनीबाट कोरोना बिमा गरेको भएमा सबै कोरोना उपचार खर्च बिमा रकमबाट गरिनेछ। सक्षम, इच्छुक र योगदान गर्न चाहने व्यक्तिहरुले परीक्षण र उपचारमा योगदान गर्न सक्ने पनि मन्त्रालयले जनाएको छ।