ताजा अपडेट
तनाव बढ्दै गएपछि बर्दिबासमा कर्फ्यू, बालिका हत्या प्रकरण
थप हिंसा हुन नदिन जिल्ला प्रशासन कार्यालय महोत्तरीले बर्दिबासमा कर्फ्यू लगाएको छ । ६ वर्षीया बालिकाको हत्या भएको विषयमा तनाव बढ्दै गएपछि बुधबार बिहान ९ बजेदेखि बर्दिबासमा कर्फ्यू लगाउने निर्णय भएको हो ।
बुधबार बिहान ९ बजेदेखि बिहीबार बिहान ६ बजेसम्म कर्फ्यू लगाउने निर्णय भएको प्रमुख जिल्ला अधिकारी (सीडीओ) कृष्णबहादुर कटुवालले जानकारी दिए ।
बर्दिबासमा मंगलबार बिहान भएको झडपमा प्रहरीको गोली लागेका सञ्जय भनिने बुद्धिराज न्यौपानेको मृत्यु भएपछि थप तनाव बढ्ने भन्दै त्यहाँको सुरक्षा व्यवस्था कडा पारिएको थियो । थप हिंसा भड्किन नदिन कर्फ्यू लगाउने निर्णय भएको हो ।
बालिका हत्याको विरोधमा उत्रिएका न्यौपानेलाई प्रहरीको गोली लागेपछि उपचारका लागि हेलिकोप्टरबाट मंगलबार काठमाडौं ल्याइएको थियो ।
न्यौपानेको ग्रान्डी अस्पतालमा उपचारको क्रममा गएराति १ बजे मृत्यु भएको हो । उनीसँगै गोली लागेर घाइते भएका श्याम कार्कीको भने उपचार भइरहेको छ।
आइतबार साँझदेखि हराइरहेकी ६ वर्षीया बालिका गुलाब साह खातुनको शव सोमबार मध्यरातमा झाडीमा बोरामा फालिएको अवस्थामा भेटिएको थियो ।
बालिका हत्याको आरोपमा पक्राउ परेका गौशाला-५ का २५ वर्षीय अरुणकुमार साहको घरमा घरमै प्रहरीले खानतलासी नगरेको भन्दै स्थानीयले तोडफोड र आगजनी गरेपछि प्रहरीले स्थिति नियन्त्रणमा लिन मंगलबार बिहान गोली चलाएको थियो ।
प्रतिक्रिया