Hamro Bulletin

नेपाली कांग्रेसको स्थापनाकालदेखि निरन्तर कांग्रेस र बहुदलको पक्षमा वकालत गरेको परिवारको मान्छे हुँ । हामीले हरेक निर्वाचनमा कांग्रेसलाई मतदान गर्यौँ । 

मतदान गरेकाले हाम्रा परिवारका केही अग्रजहरु विस्थाापित भए । तापनि त्यहीबेलादेखि आजसम्म नडगमगाएर हामीले निरन्तर कांग्रेसको पक्षमा मतदान गर्दै आएका छौँ। हामी सधैँ लोकतन्त्रको पक्षमा छौँ ।

त्यतिबेला मंगलसेनमा कांग्रेसविरुद्ध लाग्ने, कांग्रेस हराउन दरबारबाट सञ्चलितहरु, कांग्रेसजनलाई लखेट्न सघाउने व्यक्तिहरू आज नेतृत्वमा छन् । उनै नेतालाई हामीले भोट हालिरहेका छौँ । कतिबेला सम्म यो निरन्तरता चलिरहने हो, थाहा छैन । तर यतिबेला नेपाली कांग्रेसले हामीलाई न्याय गर्छ भन्ने विश्वास लिएका छौँ । हामी निरन्तर भोटरका रुपमा मात्रै प्रयोग भएर अवसर नपाउँदा पनि विचलित भएका छैनौं ।

तर, पार्टीभित्र मूल्याङ्कन, रूपान्तरण, न्याय, समानता र पुस्ता हस्तान्तरण गरिएन भने पक्कै विद्रोह हुन्छ । त्यसैले यतिबेला मंगलसेनमा हामीलाई न्याय दिन समीक्षा हुनेमा विश्वस्त छौं । हरेक दृष्टिकोणले नेतृत्व लिन सक्षम भएको जानकारी गराउँदै मंगलसेनका लागि मेरो सशक्त दाबी रहनेछ । न्याय गर्ने नगर्ने कुरा पार्टीको जिम्मा छाडेको छु ।

म त्यो परिवार बाट हुर्केको मान्छे हुँ, जुन इतिहास सम्झेर वर्तमानको प्रतिनिधित्व गर्ने प्रयासमा छु । हाम्रो परिवारबाट मेरा जेठा बाजे कृतिसिंह स्वाँरले २०१९ सालमा मंगलसेनको उप–प्रधानपञ्च र २०२० सालमा प्रधानपञ्चको जिम्मेवारी समाल्नु भएको थियो । यसैगरी ठूला बुवा पूर्णबहादुर स्वाँर र ठूलाबुवा मोतीसिंह स्वारले मंगलसेन गाउँपञ्चायतको नेतृत्व समाल्नु भएको थियो । त्यही राजनीतिक परिवार र बहुदलीय व्यवस्थाका पक्षमा जनमत बटुल्न लागेका परिवारको मान्छे हुँ ।

हाम्रा पुर्खाको यो इतिहास छ, यो इतिहासलाई अछाम कांग्रेसले यति बेला उच्च सम्मानसहित मूल्यांकन गर्ने आशा गरेको छु । हाम्रो मुख्य नेतृत्वकर्ता आदरणीय हजुरबुवा स्वर्गीय ताराप्रसाद ढुंगाना, साक्षी आदरणीय सम्माननीय व्यक्तित्व जगतबहादुर शाह (बाबु साहेव) उहाँहरुलाई हाम्रो परिवारको विस्तृत जानकारी छ । स्वर्गीय बाजे डम्बरबहादुर स्वाँर र मकरबहादुर स्वाँरको मार्गदर्शनले जुराएको यो राजनितिक अवसरका लागि धन्यवाद !

जय नेपाल