ताजा अपडेट
संघीय शिक्षा ऐन ल्याउने तयारी भइरहेको छ : मन्त्री श्रेष्ठ
काठमाडौं– शिक्षा,विज्ञान तथा प्रबिधि मन्त्री कृष्णगोपाल श्रेष्ठले सरकारले संघीय शिक्षा ऐन ल्याउने तयारी थालेको बताएका छन् ।
वि.स २०२८ सालको शिक्षा ऐनले शिक्षा क्षेत्रमा देखिएको सबै विषय समेट्न नसकेको उल्लेख गर्दै मन्त्री श्रेष्ठले शिक्षाका क्षेत्रका सबै विषय समेट्नेगरी संघीय शिक्षा ऐनको तयारी भैरहेको बताएका हुन् ।
चन्द्रागिरी नगरपालिका–१५ नैकापमा निर्माण हुन लागेको विष्णुदेवी माविको भवन सिलान्यासपछि बोल्दै यस्तो बताएका हुन् ।
मन्त्री श्रेष्ठ र भारतीय राजदूतावासका काउन्सिलर प्रफुल्ल चन्द्र शर्माले संयुक्त रुपमा विद्यालय भवनको सिलान्यास गरेका थिए ।
जनताका छोराछोरीलाई सरकारी विद्यालयमा पढ्ने वातावरण सिर्जना गर्न गुणस्तरीय शिक्षा आवश्यक रहेको उल्लेख गर्दै मन्त्री श्रेष्ठले त्यसको लागि सरकारी विद्यालयको सुधार आवश्यक रहेको बताए ।
सोही क्रममा मन्त्री श्रेष्ठले सरकारको पहिलो प्राथमिकता गुणस्तरीय शिक्षा भएको स्पष्ट पारे ।
२०७२ सालको भूकम्बाट क्षतिग्रस्त विद्यालय पुन निर्माणमा भारत सरकारको सहयोग महत्त्वपूर्ण रहेको चर्चा गर्दै मन्त्री श्रेष्ठले दुई देशबीचको सम्बन्ध मजबुत भएको बताए ।
उनले भने, ‘भारतले करीब ७० विद्यालय पुननिर्माण गरिरहेको छ, २८ आंगिक क्याम्पस बनाउने तयारी गरेको छ यस्को लागि नेपाल सरकारको तर्फबाट आभार व्यक्त गर्दछु ।’
उनले विदेशमा सरकारी विद्यालयलाई पहिलो प्राथमिकता दिने गरेको उल्लेख गर्दै अब नेपालमा पनि सरकारी विद्यालयलाई व्यवस्थित बनाउनुपर्ने उल्लेख गरे ।
कार्यक्रममा बोल्दै काउन्सिलर शर्माले नेपालको विद्यालय पुननिर्माणमा सहयोग गर्न पाएकोमा खुसी व्यक्त गरे ।
नेपाल र भारत बीचको सम्बन्धलाई थप मजबुत बनाउन यस किसिमको सहयोग निरन्तर रहनेछ शर्माले बताए । भारत सरकारको करीब साढे ६ करोड ४८ लाख रुपियाँ लागतमा निर्माण शुरु हुने सो विद्यालय भवन ३२ कोठे हुनेछ ।
ठेकेदार कम्पनीले १५ महिनामा सम्पन्न गर्नुपर्नेछ । मन्त्री श्रेष्ठले १५ नभै १३ महिना नै निमार्ण सम्पन्न गरी हस्तान्तरण गर्न ठेकेदार कम्पनीलाई आग्रह गरेका थिए ।
प्रतिक्रिया