Hamro Bulletin

 काठमाडौं - नेकपा एमाले माधवकुमार नेपाल समूहले फागुन २८ गते प्रधानमन्त्री तथा अध्यक्ष केपी शर्मा ओली समूहले गरेको निर्णयले पार्टीलाई विभाजनतर्फ धकेलेको जनाएको छ ।

नेपाल समूहले भोलि र पर्सी राजधानीमा आयोजित राष्ट्रिय कार्यकर्ता भेलाको सन्दर्भमा आयोजित पत्रकार सम्मेलनमा नेता सुरेन्द्र पाण्डेले ओली समूहले पार्टीलाई छिन्नभिन्न बनाउन खोजेको भन्दै चिन्ता व्यक्त गर्नुभयो । पाण्डले ओलीको कदमले नेकपापछि एमालेलाई पनि छिन्नभिन्न बनाउन खोजेको आरोप लगाउनुभयो ।

ओलीले पार्टी एकताको महत्वलाई घटाउन खोजेको पाण्डेको आरोप छ । ओलीले फागुन २८ गते गुटको भेलाबाट एकलौटी निर्णय गरेर पार्टी विभाजनको आरम्भ गरेको उहाँले बताउनुभयो ।

गुटको भेला गरेर ओलीले पार्टी विभाजनलाई वैधानिकता दिन खोजेको उहाँले आरोप लगाउनुभयो । फागुन २८ गते आफू पक्षीय केन्द्रीय सदस्यको बैठक राखेर ओलीले आफू अल्पमतमा भएको २३ सदस्यीय स्थायी समिति खारेज गर्नुभएको थियो भने नेपाल पक्षका नेताहरुले पाएको थप जिम्मेवारी पनि खोस्नुभएको थियो ।

ओलीले आफू पक्षीय केन्द्रीय सदस्यको बैठक राखेर अध्यक्ष महासचिव बाहेक अरु पदाधिकारीको जिम्मेवारी खोसेर माओवादी पक्षबाट आएका २३ जनालाई केन्द्रीय सदस्यमा मनोनित गर्ने निर्णय गर्नुभएको थियो ।