ताजा अपडेट
पार्टी कमिटीमा ३५ प्रतिशत महिला अनिवार्य गर्ने माओवादी केन्द्रको निर्णय
काठमाडौँ– नेपाल कम्युनिस्ट पार्टी (माओवादी केन्द्र) ले पार्टीको केन्द्रीय कमिटीदेखि वडा कमिटीमा ३५ प्रतिशत महिला अनिवार्य गर्ने निर्णय गरेको छ ।
पार्टी कार्यालय पेरिसडाँडामा बसेको माओवादी स्थायी कमिटी बैठकले केन्द्रीय कमिटीमा प्रस्ताव गर्ने गरी अन्तरिम विधान संशोधन प्रस्तावलाई पारित गर्दै राष्ट्रिय महाधिवेशनअघि नै समावेशी प्रणालीअनुसारको पार्टी कमिटि बनाउने निर्णय गरेको हो ।
माओवादी केन्द्रले केन्द्रीय कमिटीमा कम्तिमा १५ प्रतिशत र प्रदेश, जिल्ला र पालिकामा २ प्रतिशत उत्पीडित दलितको प्रतिनिधित्व थपिने व्यवस्था गरिएको र दलित समुदायलाई विशेष अधिकार दिएर सबै कमिटीमा प्रतिनिधित्व सुनिश्चित गराउने निर्णय समेत गरेको छ ।
४० वर्ष उमेर समूहका २० प्रतिशत युवालाई सबै कमिटीमा राख्ने निर्णय समेत माओवादीले गरेको छ । पार्टीको सबै कमिटीको पादधिकारीमा एक जना महिला राख्ने निर्णय गरेको र केन्द्रीय कमिटी २९९ जनाको हुनेछ ।
बैठकले कोरोना माहामारी नियन्त्रणमा काम गर्ने गरी सर्वपक्षीय राजनीतिक संयन्त्र बनाउन सरकारसँग माग गरेको छ । बैठकले भारतमा संक्रमण बढेकाले सीमाहरुमा कडाईपूर्वक नियन्त्रण गर्न र नेपाल आउनेलाई परीक्षण लगायतका मापदण्ड पूरा गर्न मात्र आउन दिन आग्रह गरेको प्रवक्ता नारायणकाजी श्रेष्ठले जानकारी दिए ।
डेडिकेटेड कोभिड–१९ अस्पताल बनाउन, अक्सिजन, आईसीयू भेन्टिलेटर र आइसोलेसन सेन्टरको व्यवस्था गर्न, स्वास्थ्य सामग्रीको जोहो गर्न र फ्रन्टलाइनमा रहेकाहरुका लागि काम गर्ने उपयुक्त वातावरण सुनिश्चित गर्न पनि स्थायी कमिटि बैठकले सरकासँग माग गरेको छ ।
केपी ओली नेतृत्वको सरकार विस्थापन गर्न यसअघि नै तयार भएको तर नयाँ सरकार गठनका लागि जसपाको साथ अनिवार्य भएकाले जसपाको निर्णय पर्खिएको माओवादी केन्द्रले जनाएको छ ।
प्रतिक्रिया