ताजा अपडेट
नेपाल पक्षको अल्टिमेटम थाहा छैन, अर्थ पनि छैन : सुवास नेम्वाङ
नेकपा एमालेका नेता तथा संसदीय दलका उपनेता सुवास नेम्वाङले खनाल–नेपाल समूहले दिएको अल्टिमेटमको कुनै अर्थ नभएको बताएका छन् ।
नेता नेम्वाङले माधव पक्षले आफूहरुसँग कुरा गर्दा कुनै शर्त वा अल्टिमेटम पनि नदिएको र यदि दिएको भए पनि त्यसको कुनै अर्थ नहुने रातोपाटीलाई बताए । उपनेता नेम्वाङले माधव नेपालको ६ बुँदे सर्तबारे पनि आफुलाई थाहा नभएको बताए ।
‘त्यस्तो कुनै शर्त पनि राख्नुभएको छैन । उहाँहरुले हामीसँग कुरा गर्दा अल्टिमेटम पनि दिनुभएको छैन,’ नेम्वाङले भने, ‘राति १२ बजे गर्नुभयो भने त्यो त हामीसँग सरोकार नै भएन ।’
रातोपाटीसँगको कुराकानीमा नेम्वाङले आफूहरुसँग कुरा गर्दा नेता नेपालले बरु ठोस प्रस्ताव ल्याउन भनेको बताए । उनले भने, ‘अनि हामीले तपाईले भनेको प्रस्ताव ठीक हो, त्यसमा छलफल गरौं, हामीले नै के गर्ने भनेर प्रस्ताव गरौं र छलफल गरौं भनेका हौ । साथै हामीले यो बीचमा ‘इरिटेसन’ हुने कुनै पनि काम नगरौं भन्याैँ ।’
आफूले राजीनामा साजिनामाका कुरा नगरौं भन्दा नेपालले हुन्छ वा हुन्न केही नभनेको भन्दै टाउको मात्रै हल्लाएको नेम्वाङले सुनाए ।
‘म जे छ, त्यही भन्छु’, नेम्वाङले सोही कुरा अध्यक्ष ओलीलाई सुनाएको बताए । जवाफमा ओलीले पनि टाउको मात्रै हल्लाएको नेम्वाङको भनाइ छ । ‘अध्यक्षले पनि ठीक छ भन्नुभयो, टाउको मात्रै हल्लाउनुभयो’, ओलीको भनाइ उद्धृत गर्दै नेम्वाङले भने, ‘कुनै नेगेटिभ कुरा गर्नुभएन ।’
अल्टिमेटमको म्याद सकियो
यसैबीच, एमालेको खनाल नेपाल समूहले अध्यक्ष तथा प्रधानमन्त्री केपी शर्मा ओलीलाई पार्टी एकताका लागि दिएको अल्टिमेटमको म्याद सकिएको छ । प्रधानमन्त्री ओलीले विश्वासको मत लिने समय नजिकिँदै गएका बेला आइतबार साँझ सो समुहको बैठक बसी सोमबार साढे नौ बजेसम्म पार्टीलाई २०७५ जेठ २ को अवस्थामै फर्काएर चलाउने तथा सहमतिका आधारमा पार्टी सञ्चालन गर्ने प्रतिवद्धता जनाउन शर्त राखेको थियो ।
बैठकपछि वरिष्ठ नेता माधवकुमार नेपालले अध्यक्ष ओलीलाई ६ बुँदे सर्तसहितको पत्रसमेत पठाएका थिए ।
तर, माधव पक्षले राखेको उक्त शर्तमा अध्यक्ष ओलीले कुनै जवाफ नदिएको नेम्वाङले बताएका छन् । ओलीको जवाफ नआएपछि असन्तुष्ट समूहले बैठक बसेर सामुहिक राजीनामा दिने तयारी गरेको छ ।
प्रतिक्रिया