ताजा अपडेट
ऋषि कपुरका भाइ तथा अभिनेता राजिव कपुरको निधन
बलिउड अभिनेता राजिव कपुरको हृदयघातका कारण ५८ वर्षको उमेरमा निधन भएको छ । उनले चेम्बूरको इलेक्स अस्पतालमा अन्तिम सास फेरे । उनलाई हृदयघात भएपछि नजिकैको अस्पताल पुर्याइएको थियो जहाँ डाक्टरले उनको निधन भइसकेको जानकारी दिए । उनका जेठो दाइ रणधीर कपुर अन्तिम समयमा उनीसँग रहे ।
भारतीय मिडियामा प्रकाशित समाचार अनुसार राजिवलाई हृदयघात हुने बित्तिकै दाइ रणधीर कपुरले उनलाई नजिकैको अस्पताल पुर्याए तर उपचार सुरु हुनु अघि नै राजिव कपुरको निधन भयो । भाइको निधन भएको खबर सुन्ने बित्तिकै रणधीर कपुर नराम्रोसँग टुटेको स्रोतले बताएको छ । उनी भावुक भएको तस्बिर पनि भारतीय सञ्चार माध्ययमा देख्न सकिन्छ ।
सात महिना अघि रणधीरका भाइ तथा बलिउडका दिग्गज अभिनेता ऋषि कपुरको निधन भएको थियो । अघिल्लो वर्षको अप्रिल ३० मा ऋषि कपुरको निधन भएको थियो । उनी क्यान्सरसँग जुधिरहेका थिए र मुम्बईको अस्पतालमा उनले अन्तिम सास फेरे ।
रणधीरले निकै भावुक हुँदै आफ्ना भाइको मृत्युबारे भने, ‘मैले आफ्नो कान्छो भाइ राजिवलाई गुमाएँ । चिकित्सकले निकै कोसिस गरे तर उनीहरुलाई बचाउन सकिएन ।’ राजिव कपूरले फिल्म ‘एक जान हे हम’ बाट हिन्दी सिनेमामा अभिनेताको रुपमा डेब्यू गरेका थिए । उनको सबैभन्दा हिट फिल्म ‘राम थेरी गंगा मैली’ रह्यो ।
प्रतिक्रिया