ओलीटिक्सका बारेमा लेख्दिनँ भन्दा–भन्दै …!
खासमा कन्टिर–बाबूलाई आज केही लेख्ने कुनै मुड नै चलेको छैन । घुमिफिरी त्यही पोलिटिक्स अर्थात् राजनीति अनि त्यही ओलीटिक्स अर्थात् ओल्बा–कृत्यका बारेमा कति लेख्नु ?
त्यसैले आज कन्टिर–बाबू ओल्बाका सम्बन्धमा केही विशेष कुरा लेख्ने र भन्ने मुडमा छैनन् । उनलाई कि शासन व्यक्तिको होइन विधिको हुनुपर्छ भनेर सम्झाउनु, कुनै अर्ती–उपदेश, सल्लाह दिनुको केही अर्थ भए पो त लेख्नु–बोल्नु पनि ।
खाली आफ्नैमात्र कुरा गर्छन्, आफ्नै कुरामा अड्डी कस्याकस्यै गर्छन् । उनले अर्काको कुरा सुन्न छोडेको तीन वर्षभन्दा बढी भइसक्यो । त्यसैले कन्टिर–बाबूले आज उनका बारेमा केही नबोल्ने, नलेख्ने निर्णय गरेका हुन् ।
त्यसो त कन्टिर–बाबूको यस निर्णयबाट प्रतिगमनविरुद्ध खबरदारी मोर्चामा रहेकाहरू निराश हुन सक्लान् । उनीहरूलाई केही असजिलो त पनि पक्कै होला । तर कन्टिर–बाबूले आफ्नो निर्णयमा अडिग छन्, जे निर्णय गरे, गरे । आफ्नो निर्णयको रक्षामा सवालमा कन्टिर–बाबू, हिन्दी सिनेमाका नायक सलमान खानको डायलग र शब्द सापट लिँदै भन्छन्– सार्वजनिक रूपमा कुनै कमिटमेन्ट गरिसकेपछि कन्टिर–बाबू आफ्नै मनको कुरा पनि सुन्दैनन् ।
ओल्बाले शेरबहादुर देउवालाई भाषा सिकाउन् कि रापले संसदमा देउवाको बोलीप्रति गरेको व्यङ्ग्यलाई हाँसोमा उडाउन् कन्टिर–बाबूलाई बाल मतलब छैन । मतलब राखेर पनि के गर्नु हाम्रा ओल्बा सुध्रिनेवाला जीव होइनन् । कोही चाहे जो हो, हम नही सुधरेगें भन्छ भने कन्टिर–बाबूको मात्र होइन, देवाधिदेव महादेव पशुपतिनाथको पनि केही लाग्दैन !
ओल्बाले मध्यरातमा संसद् विघटनको सिफारिस गरुन् कि देउवाले एक सय ४९ सांसदको हस्ताक्षर पुर्याएको थाहा पाउनासाथ हतार–हतार एमाले र जसपाको पत्रमात्रका आधारमा एक सय ५३ सांसदको सङ्ख्या पुर्याएको दाबी गरुन्, कन्टिर–बाबूलाई कुनै मतलब भएन ।
राजनीतिमा केको विधान, केको प्रक्रिया ? केको नैतिकता, केको इमानदारी ? जो जिता वही सिकन्दरवाला शैलीमा कोही राजनीति गर्न चाहन्छ भने कन्टिर–बाबू ओल्बाले नै पटक–पटक भने जस्तो– भीरबाट लड्ने गोरुलाई राम–राम भन्न सकिन्छ, काँध थाप्न सकिँदैन ।
यस्तो जगजगी परिस्थितिमा दुःख–मनाउ गरेर मात्र के गर्नु ? त्यसैले कन्टिर–बाबू आज ओल्बाप्रति कुनै टिप्पणी गर्नेवाला छैनन् । मात्र आशावादी छन्– अबचाहिँ ओल्बाको ध्यान कोरोनाको अहिले चलिरहेको दोस्रो र चुनाव हुने भनिएको कात्तिक–मङ्सिरतिर आउने प्रक्षेपण गरिएको तेस्रो भेरियन्टप्रति पक्कै पनि गम्भीर हुनेछ ।
कोशी अनलाईनबाट
प्रतिक्रिया