ताजा अपडेट
अख्तियारको कार्यालय महेन्द्रनगरमा अनियमितता विरुद्धका १७३ उजुरी दर्ता
धनगढीः अख्तियार दुरुपयोग अनुसन्धान आयोगको कार्यालय कञ्चनपुर (महेन्द्रनगर) मा आर्थिक अनियमितता विरुद्धका एक सय ७३ उजुरी दर्ता भएका छन्।
यो संख्या चालु आर्थिक वर्षको पहिलो महिना (साउन) को मात्र हो। चालु आर्थिक वर्ष सुरु भएसँगै उजुरीकर्ताले विभिन्न माध्यमको प्रयोग गर्दै एकपछि अर्को उजुरी दर्ता हुनेक्रम बढेको छ। त्यस्तै भदौ महिनाको पहिलो सातामै थप २७ उजुरी दर्ता भएको अख्तियार दुरुपयोग अनुसन्धान आयोगको कार्यालय कञ्चनपुरको तथ्यांकले देखाएको छ।
चालु आर्थिक वर्ष सुरु भएको डेढ महिना नपुग्दै यस्ता अनियमितताका दुई सय उजुरी अख्तियार दुरुपयोग अनुसन्धान आयोगको कार्यालय कञ्चनपुरमा दर्ता भएको पाइएको छ। अधिकांश उजुरी स्थानीय तहसँग सम्वन्धिन रहेको कार्यालयले जनाएको छ। लिखित, इमेल, भाइबर तथा टेलिफोन लगायतको माध्यमबाट आफ्नो पालिकामा भइरहेका अनियमितता विरुद्धका उजुरी दिनेको संख्या बढ्दै गएको कार्यालयले जनाएको छ।
प्रदेशभित्र संघीय तथा प्रदेश मातहत सञ्चालित योजनाहरुमा समेत आर्थिक अनियमितता हुने गरेको विषयमा समेत कार्यालयमा उजुरी पर्ने गरेका छन्। यस्ता उजुरी सबैभन्दा बढी कैलालीबाट पर्ने गरेका छन्। अधिकारीहरुका अनुसार अख्तियारमा परेका कुल उजुरीमध्ये करिब ४० प्रतिशत उजुरी स्थानीय तहसँग सम्वन्धित हुने गरेका छन्।
प्रतिक्रिया