Hamro Bulletin

इन्डियन प्रिमियर लिग (आईपीएल) मा रोयल च्यालेन्जर्स बैंगलोरले रोमाञ्चक जित हात पारेको छ । आफ्नो तेस्रो खेलमा दोश्रो जित निकाल्ने क्रममा बैंगलोरले साबिक बिजेता मुम्बई इन्डियनलाई सुपर ओभरमा पराजित गरेको हो ।

सोमबार राति दुबईमा भएको खेलमा बैंगलोरले दिएको २०२ को लक्ष पछ्याएको मुम्बईले निर्धारित ३० ओभरमा ५ विकेट गुमाउँदै २०१ रन मात्र जोड्न सक्यो । रन बराबरी भएपछि खेल सुपरओभरमा गएको थियो । मुम्बईका लागि इशान किशनले ९९ रन जोडेभने किरन पोलार्डले ६० रन तथा हार्दिक पान्डे र क्विन्टर डिककले समान १४/१४ रन बनाए ।

बैंगलोरका इशुरु उडानाले २ विकेट लिए । एडम जाम्पा, वासिंगटन सुन्दर र युजभेन्द्र चाहलले १/१ विकेट लिए ।

त्यसअघि पहिले ब्याटिङ गरेको बैंगलोरे निर्धारित २० ओभरमा ३ विकेट गुमाएर २०१ रन बनाएको थियो। बैंगलोरका लागि एबी डी भिलियर्स, देवदत्त पाडीक्कल र आरोन फिन्चले अर्धशतकीय इनिङ्स खेले । डी भिलियर्सले अविजित रहदै ५५ रनको अर्धशतकीय इनिङ्स खेले । यस्तै पाडीक्कलले ५४ रन जोड्दा फिन्चले ५२ रन बनाए ।

शिबम डुबे २७ रनमा अविजित रहे । कप्तान विराट कोहली ३ रनमा आउट भए । मुम्बईका ट्रेन्ट बोल्टले २ तथा राहुल चाहरले १ विकेट लिए ।

खेल सुपर ओभरमा गएपछि पहिलो ब्याटिङ गरेको मुम्बईले ७ रन जोड्यो । नवदीप सैनीको सुरुवाती दुई बलमा किरन पोलार्ड र हार्दिक पान्ड्याले १-१ रन लिए । तेस्रो बलमा पोलार्डले डट खाए । चौथो बलमा पोलार्डले चौका प्रहार गरे । पाँचौ बलमा भने उनी क्याचआउट हुन पुगे । अन्तिम बलमा हार्दिकले १ रन लिए ।

जवाफमा मुम्बईका जसप्रित बुमराहविरुद्ध बैंगलोरका कप्तान विराट कोहली र एबी डी भिलियर्स ब्याटिङमा आएका थिए । पहिलो बलमा एबीले एक रन जोडे । दोस्रो बलमा कोहलीले पनि १ रन लिए । तेस्राे बलमा रन हुन सकेन । चौथो बलमा डी भिलियर्सले चौका प्रहार गरे । पाँचौ बलमा १ रन लिएपछि कोहलीले अन्तिम बलमा चौका प्रहार गर्दै ब‌ैंगलोरलाई जित दिलाए ।