Hamro Bulletin

महान् पाठक–पाठिका सबैलाई थाहा होला कन्टिर–बाबू प्रेस, सूचना, विचार तथा अभिव्यक्ति स्वतन्त्रताका कुन हदसम्मका पक्षपाती हुन् ।

नेपालमात्रै होइन विश्वकै कुनै पनि ठाउँमा स्वतन्त्रतामाथि आघात पुग्छ भने कन्टिर–बाबू त्यसलाई आफ्नो सरोकारको विषय ठान्छन् । भारतको सन्दर्भप्रति त कन्टिर–बाबू अझै बढी संवेदनशील हुन्छन् । कारण, नेपालले बढी देखासिकी गर्ने भनेकै भारतीय समाजको हो ।

त्यसो त नेपाल सरकारले भारतको राम्रो उदाहरणको सिको गरे त राम्रै हुन्थ्यो । तर कन्टिर–बाबूको अपेक्षाविपरीत यहाँ हुन्छ उल्टो । यहाँको सरकारले खाली नराम्रो कुरामात्र सिक्छ ।

भारतमा अहिले एउटा पोस्टर काण्ड निकै चर्चामा छ । केही अभियन्ताले एक पोस्टर सार्वजनिक गरी भारत सरकारसँग कोभिडको उपचार र खोपका सम्बन्धमा प्रश्न गरेका छन् । तर भारत सरकारले ती अभियन्ताहरूको प्रश्न मन पराएको छैन र त्यस्ता उनीहरूलाई खोजी–खोजी पक्राउ गरिरहेको छ ।

भारत सरकारको सो (कु)कृत्यको निकै आलोचना भइरहेको छ । लोकतन्त्रमा प्रश्न र आलोचना गर्न पाउने अधिकारमाथिको आक्रमण ठानिएको छ । कन्टिर–बाबू यस कुरासँग सहमति व्यक्त गर्दै प्रश्न सोध्न पाउने जनताको अधिकार विश्वमा कहीँ पनि कुण्ठित हुन नहुने कुराको वकालत गर्छन् ।

त्यसै पनि वर्तमान नेपाल सरकार जनताको प्रश्न सोध्न पाउने अधिकारप्रति सुरुदेखि नै असहिष्णु रहँदै आएको छ । झन् भारतको पछिल्लो घटनाबाट सिकेर नेपाल सरकारले आफूलाई प्रस्तुत नगरोस् भन्ने पिरलोले यतिखेर कन्टिर–बाबू त्रसित छन् ।

कोभिड समस्या सुरुमै बुझ्न असफल ओल्बा नेतृत्व र सरकारको व्यापक आलोचना भइरहेकै छ । तर मनासिब आलोचना गर्दा पनि सरकारले पालेका अरिङ्गाल र साइबर–सेना भुरुरु खनिने देश हो यो । यस्तोमा सर्वसाधारण स्तरबाट भारतमा जस्तै पोस्टर मामिला देखिए सरकारले सजिलै पचाउन सक्ला भन्न कठिन छ ।

कन्टिर–बाबू भन्छन्– सबै बिपी–बाबूझैँ कहाँ हुन्छन् र ! बिपी–बाबूले त आफू सत्तामा हुँदा आफ्ना विरोधी विचारका पत्रकारलाई पैसा दिएर सरकारको आलोचना गर्न प्रोत्साहित गर्थे । कन्टिर–बाबूको प्रश्न छ– अहिलेका सरकारहरूमा छ यस्तो आँट ?

लोकतन्त्रमा प्रेस, सूचना र विचार अभिव्यक्तिको स्वतन्त्रता हुनुपर्छ भनेको त्यसैले हो । सर्वसाधारणले गरेको प्रश्न र आलोचनालाई सरकारले सुझावका रूपमा ग्रहण गर्नुपर्छ भन्ने विश्वव्यापी मान्यता हो ।

कन्टिर–बाबूको अनुभव छ, अमेरिका तथा युरोपमा विचार तथा अभिव्यक्ति स्वतन्त्रताका लागि त्यहाँका सरकारले सहयोग गर्छन् । तर नेपालमा विचार तथा अभिव्यक्ति स्वतन्त्रताको अवस्था के छ ? जगजाहेरै छ । नेपालमा सरकारको आलोचना गरेकै आधारमा धरपकड साथै भरौटे खटाएर धम्क्याउने कुकृत्य हुन्छ । कन्टिर–बाबू यस कुराको घोर विरोध गर्छन् ।

सामाजिक सञ्जाल वा कुनै मिडियामा सरकारका विपक्षमा कुनै विचार आए त्यसविरुद्ध सामूहिक रूपमा खनिनेहरूको योजनाबद्ध हर्कत प्रष्ट अनुभव गरेका छन् कन्टिर–बाबूले । सरकारले पुरस्कृत गर्ने बेलामा त्यस्तैलाई प्राथमिकता दिने गरेको पनि सुनेका छन् ।

अरे यार, यो त लोकतन्त्रविरोधी कर्तुत हो । कन्टिर–बाबूको चासो छ– यसलाई कसरी स्वीकार गर्न सकिन्छ ?

कोशी अनलाईन बाट साभार