ताजा अपडेट
बाँच्नेलाई पनि समस्या, मर्नेलाई पनि समस्या !
हिन्दी भाषामा एक उखान छ– आसमान से गिरा, खजुर पे अटका । नेपाली भाषामा यसको सामान्य अनुवाद हुन्छ– आकाशबाट झरेर खजुरको बोटमा अडकिनु । यसको भावार्थ हुन्छ– एउटा समस्याबाट पार पाउन सकिएको छैन, अर्काे समस्या खडा भइसकेको हुन्छ ।
नेपालको सन्दर्भमा हालको परिस्थिति ठिक यस्तै छ भन्ने ठान्छन् कन्टिर–बाबू । एकमाथि एक समस्या खप्टिँदै गइरहेका छन्, तर समाधानको भेउ पाउन सकिएको छैन ।
अरे ल सुन यिनका कुरा । कोरोनाको कहर त छँदै थियो । यसमाथि उपचार पाउन कति गाह्रो छ भन्ने कुरा कन्टिर–बाबूलाई मात्र होइन, सबैलाई थाहा छ । कोरोनाबाट मृत्यु हुनेहरूको सद्गत गर्न पनि त्यतिकै गाह्रो छ ।
कन्टिर–बाबू भन्छन्– नेपालीको बाँच्न पाउने हक सङ्कटमा त थियो नै अब सद्गत गर्ने सांस्कृतिक हक पनि कुन्ठित हुने अवस्था छ । सद्गतकै सन्दर्भमा हाम्रो सरकारले पशुपति आर्यघाटमा दाउराको कमी हुन दिइन्न भन्ने उद्घोष गर्यो । तर यस्तो उद्घोषको के अर्थ ? जब कि दाह-संस्कार कार्यमा पनि अब महँगो शुल्क तिर्न मान्छेहरू बाध्य बनाइएका छन् ।
कन्टिर–बाबू भन्छन्– सरकार कतिसम्म लाचार भएको ? अरे यार जनतालाई उपचार त दिन सकिएन नै अब दाह–संस्कारमा पनि शुल्क ?
कुरा यतिमात्र होइन, अक्सिजन समस्याको थोते समाधान हुन खोजेको हो कि हो कि जस्तो भानमात्र के भएको थियो बजारमा सिटामोलकै अभाव छ भन्ने कुरा आउन थाल्यो । कन्टिर–बाबू आश्चर्यचकित हुँदै भन्छन्– अरे भाइ आखिर यो ओल्बा–राजमा भइ के रहेको छ ?
कुरा यहीँ टुङ्गिदैन । कोरोनाको एकथरी भेरिएन्टले हायलकायल पारेकै थियो त्यसमाथि कोरोनाको अर्को ढिटखाले नयाँ भेरियन्ट नेपालमा फेला पर्यो रे ! तर हाम्रो सरकार छ कि आकाशमार्गबाट हुने विदेश यात्रालाई अझै पूर्ण रूपमा निषेध गर्न गम्भीर बनेको छैन ।
अस्ति मन्त्रिपरिषद् बैठकमा ओल्बाले हाकाहाकी भनिदिए– कोरोनाले यति उग्र रूप लेला भन्ने अनुमान सुरूमा मलाई थिएन । अहिले अर्को जब्बर भेरियन्ट आउँदै गर्दा सरकारको व्यवहार जस्तो छ, त्यसलाई विचार्दा एक–दुईपछि सरकारका तर्फबाट प्रतिक्रिया आउने होला– यो भेरियन्टले यसरी जनधनको क्षति गर्छ भन्ने अनुमान सुरुमा थिएन । कन्टिर–बाबू मनमनै कल्पिरहेछन्– हे भगवान् ! थेथरको उपचार के छ ?
यस्तोमा जनसामान्यले गर्ने ? उही पहिले–पहिले राजाहरूले भन्ने गरे जस्तो श्री पशुपतिनाथले रहलपहल, बाँकी बचेका सबैको कल्याण गरुन् भनेर जपी बस्ने कि सरकारलाई जबाफदेही बनाउन गत वर्षको झैँ ‘इनफ इज इनफ’ भन्दै सडकमा आउने ? कन्टिर–बाबूले केही सोच्न सकेका छैनन् ।
कोशी अनलाईनबाट साभार
प्रतिक्रिया