ताजा अपडेट
मिति सकिएको अस्त्र लिएर महायुद्धमा काङ्ग्रेस, भनाइमा लोकतन्त्र, व्यवहारमा कन्जुस्याइँ
यी काङ्ग्रेसीजनका कुरा पनि बडा गजबका छन् । कन्टिर–बाबूलाई यिनका कुरा कहिलेकाहीँ उदेकलाग्दासमेत लाग्छन् ।
प्रायः सबै काङ्ग्रेसीहरू आफूलाई बिपीका सच्चा अनुयायी र लोकतन्त्रका पहरेदार ठान्छन् । पार्टीको नेतृत्व पङ्क्तिमा रहेकाहरू आफू ‘लोकतन्त्रको च्याम्पियन’ खेलाडी भएको दाबी गर्छन् । तर पार्टीको आन्तरिक जीवन र स्वयम् आफैँभित्र लोकतन्त्रको व्यावहारिक अभ्यास गराइमा भने कन्जुस्याइँ देखाउँछन् । अब यति भन्दा कोही काङ्ग्रेसजनलाई नराम्रो लाग्छ भने कन्टिर–बाबू केही गर्न सक्दैनन् ।
कन्टिर–बाबूले थाहा पाए अनुसार विधानतः नेपाली काङ्ग्रेसको कार्यसमितिको पदावधि चार वर्षको हो । काबुबाहिरको समस्या भए वा कोरोनाजस्तै केही भैपरी आए एक वर्ष म्याद थप्न सकिने प्रावधान छ । तर जेसुकै गरे पनि पाँच वर्षभित्र सबै तहको अधिवेशन, महाधिवेशन सम्पन्न र नयाँ नेतृत्व चयन गरिसक्नुपर्छ ।
तर ले घाँस, नेपाली काङ्ग्रेसको महाधिवेशनको म्याद गुज्रिसकेको कति भयो ? धेरै जनालाई थाहै छैन । अरे यार, राजनीतिक पार्टी होस् वा जुनसुकै सङ्घ–संस्था, आफ्नो म्याद कहिलेसम्म छ भन्ने चियोचर्चो समय–समयमा गरिरहनुपर्छ । अन्यथा पार्टी म्याद गुज्रिएको (डेट एक्सपायर) औषधिजस्तो काम नलाग्ने हुन बेर लाग्दैन ।
तर डुब्न लागेकोलाई त्यान्द्रो भर भने जस्तो धन्न संविधानले पार्टीको डेट एक्सपायर जीवनमा अक्सिजनको काम गरिरहेको छ । कसो-कसो बुद्धि पुर्याएर वा यस्तै हुन्छ भन्ने जानेर २०७२ सालको संविधानमा ‘बाधा–अड्काउ फुकाउन’ ६ महिना थप्न सकिने प्रावधान राखेका रहेछन् । र अहिले त्यही अन्तिम अस्त्र हातमा लिएर महाधिवेशनको महायुद्धमा उत्रेको छ काङ्ग्रेस ।
तर थपिएको ६ त्यही महिनामध्ये पनि चार महिनाको म्याद त गुज्रिसकेको छ, क्रियाशील सदस्यताको रस्साकस्सीमै । कन्टिर–बाबूका अनुसार समय छँदा नेताहरू पद छोड्न तयार नभएकाले नै अहिले यो अप्ठेरो परिस्थिति बनेको हो । समयमा अधिवेशन र महाधिवेशन गराएनन् । अहिले एकैचोटी बाक्लो ताप्के तताउन खोजेका छन् । यदि भदौ १६ गतेसम्म ताप्के तातेन भने के हुन्छ ? कन्टिर–बाबू चस्माको डाँडीमा दाहिने हात राखेर सोचिरहेका छन् ।
काङ्ग्रेसका एक ठूलै नेताले भनेको कन्टिर–बाबूले सुनेका छन्– ताप्के तात्न सजिलो छैन । लक्षण त देखिइसकिएको छ । क्रियाशील सदस्यता टुङ्गो लगाउने विषय नै महाभारत भइसक्यो । कन्टिर–बाबू पनि भन्छन्– असार सकिन लाग्यो, क्रियाशील सदस्यता नै नटुङ्ग्याइकन भदौ १६ सम्म सात चरणको अधिवेशन र निर्वाचन कसरी गर्न सकिन्छ ? काङ्ग्रेस त्यस्तो फास्ट–फरवार्ड पार्टी हो र ? बडा माथापच्ची छ यार !
त्यसो त यो कन्टिर–बाबूको समस्या होइन । जान्नेले जानुन् । जेजे गर्नु छ, गर्नेले गरून् । कन्टिर–बाबूको चासो कतिमात्र हो भने दिन तन्किँदै जाँदा समस्या पनि खप्टिँदै जाला । हुँदा–हुँदा लोकतन्त्रवादीको लोकतान्त्रिक अभ्यासमै प्रश्न उठ्ला !
प्रतिक्रिया