ताजा अपडेट
स्वस्तिकाको उदाहरण बनोस् काङ्ग्रेस सप्रिने जोडन
नेपाली काङ्ग्रेसको जारी महाधिवेशन प्रक्रियामा देखिएका नवीन–नवीन दृश्य हेर्दै कन्टिर–बाबू रमाइलो मान्दै थिए । तर पछिल्लो समय सर्वाधिक प्रचारित एउटा भाइरल प्रसङ्गबारे सोच्दा–सोच्दै कन्टिर–बाबू गम्भीर बनेका छन् ।
देशका ६ हजार सात सय ४३ वडामध्ये एउटा वडाको चर्चा बडा जोेडतोडले भएको देखेर कन्टिर–बाबू गम्भीर बनेका हुन् । त्यसो त कुनै वडाको चर्चा भाइरल हुँदैमा वा मिडियाले आवश्यकताभन्दा बढी प्राथमिकता दिँदैमा कन्टिर–बाबू गम्भीर हुनुपर्ने कुनै कारण छैन । तर कुरालाई काङ्ग्रेस रूपान्तरणको प्रश्नसँग जोडेर जसरी प्रस्तुत गरियो, त्यो सम्झेर भने उनी गम्भीर नभइरहन सकेनन् ।
प्रसङ्ग जगजाहेर छ– दैलेखको दुल्लु नगरपालिकाको ३ नम्बर वडा सभापतिमा १९ वर्षीया बहिनी स्वस्तिका महतले चुनाव जितेको कुरा । यो जितलाई यतिबेला काङ्ग्रेस समर्थकहरू सामाजिक सञ्जाल र मिडियामा यसरी प्रचार गर्दै छन् कि मानौँ १४औँ महाधिवेशनपछि काङ्ग्रेसका अधिकतर तह–तप्काको नेतृत्व युवाहरूको हातमा हुनेछ र त्यसको प्रस्थान बिन्दु स्वस्तिकाको जित हो ।
कतिले त स्वस्तिकालाई नेपाली काङ्ग्रेसकी प्रथम महिला सभापतिका रूपमा समेत चित्रित गर्न थालिसके । उनले पनि २०७६ कात्तिकमा निधन भएका बुबा भूपेन्द्रजङ्ग महतको सपना पूरा गर्न आफू १० जना प्रतिस्पिर्धीलाई ‘कन्भिन्स’ गरेर राजनीतिमा आएको प्रतिक्रिया दिइसकिन् ।
महाकवि देवकोटाले उद्देश्य के लिनु छुनु चन्द्र एक भने जस्तो काङ्ग्रेसका संस्थापक नेता बिपी कोइरालाको सपना पूरा गर्ने सामर्थ्य उनमा आओस्, कन्टिर–बाबूको अग्रीम शुभकामना छ ।
कन्टिर–बाबू भन्छन्– ठिक छ, उनी राजनीतिमा सफल बनुन्, महतजीले राजनीतिमा लागेर देखेको सीमान्तकृतको सेवा गर्ने सपना पूरा गरुन् । महाकवि देवकोटाले उद्देश्य के लिनु छुनु चन्द्र एक भने जस्तो काङ्ग्रेसका संस्थापक नेता बिपी कोइरालाको सपना पूरा गर्ने सामर्थ्य उनमा आओस्, कन्टिर–बाबूको अग्रीम शुभकामना छ ।
तर कन्टिर–बाबू सोचिरहेका छन्– नेपालगन्ज टेक्निकल कलेजमा हेल्थ असिस्टेन्ट (एचए)की छात्रा स्वस्तिकालाई भविष्यमा एउटा राम्रो चिकित्सक बनाउने उनका बाबुको सपना थियो कि थिएन ? के निधन हुनुअघि पूर्व–जिल्ला उपसभापति भूपेन्द्रजीले छोरीलाई भविष्यमा नेता बनाउने सपना देखेका थिए ? यदि थिए भने छोरीलाई राजनीतिशास्त्र पढ्न पठाउँथे कि एचए पढ्न पठाउँथे ?
त्यसो त राजनीतिमा उमेर र शिक्षाको खासै महत्त्व नदेख्नेहरूको बाहुल्यता भएको समाजमा हामी छौँ । तर दुनियाँले तर्क जे गरे पनि अहिले स्वस्तिकाको राजनीति गर्ने बेला भएको थिएन, पढाइ कम से कम स्नातकसम्म छिचोलेको भए तै बरू एउटा कुरा हुन्थ्यो भन्ने कन्टिर–बाबूलाई लागेको छ ।
स्वस्तिकाको उदाहरणले काङ्ग्रेस पार्टीको जीवनमा जोडनको काम गर्ला कि हम नहीं सुधरेङ्गे वाला पारा कायमै रहला ?
यसबाहेक एउटा वडा समितिको नेतृत्वमा सर्वसम्मत स्थापित गरिएकी १९ वर्षीया ती बहिनीको उदाहरणले देशैभर काङ्ग्रेसमा युवा नेतृत्व स्थापित हुँदै छ भने जसरी जुन तर्क भइरहेको छ, त्यसलाई भने अपव्याख्या मान्छन् कन्टिर–बाबू । कारण पार्टीभित्र जिरेटोक्र्याट (बूढा शासक)हरूको हालीमुहाली भएको कन्टिर–बाबूलाई मात्र होइन, दुनियाँलाई थाहा छ ।
कन्टिर–बाबू भन्छन्– एउटा उदाहरण देखाएर मात्र हुँदैन । पार्टीको तलदेखि माथिसम्मको संरचनामा साँच्चिकै युवाहरूको प्रतिनिधित्व आधाभन्दा बढी भयो भने मानौँला १४औँ महाधिवेशनलाई काङ्ग्रेसजनले साँच्चिकै परिवर्तनको अवसरका रूपमा बुझेछन् । अन्यथा कोरोनाको तेस्रो लहर फैलिने आशङ्का भइरहेका बेला धेर नखोकेकै राम्रो !
कन्टिर–बाबू सोच्छन्– स्वस्तिकाको उदाहरणले काङ्ग्रेस पार्टीको जीवनमा जोडनको काम गर्ला कि हम नहीं सुधरेङ्गे वाला पारा कायमै रहला ? कोशी अनलाईनबाट धर्मेन्द्र झा को स्तम्भ
प्रतिक्रिया