शारदा ब्यारेजमा रातो बत्ति बालियो, महाकाली नदीको जलस्तर ९२ वर्षयताकै उच्च

महाकाली नदीको जलस्तर अहिलेसम्मकै सबैभन्दा उच्च मापन गरिएको छ। महाकाली नदीमा निर्माण भएको शारदा ब्यारेजमा ९२ वर्षयताकै ठूलो जलस्तर मापन गरिएको हो।

‘नदीमा पानीको जलस्तरले अहिलेसम्मकै रेडर्क तोडेको छ,’ इलाका प्रहरी कार्यालय गड्डाचौकीमा प्रहरी नायव निरीक्षक जीवन गुरुङले भने,‘यो नदीमा पानीको जलस्तरको क्षमता नै ६ लाख क्यूसेक हो।’

उनका अनुसार महाकाली नदीमा पानीको जलस्तर दिउँसो २ बजेसम्म ५ लाख ४७ हजार २ सय २४ क्यूसेक मापन गरिएको छ। यसअघि महाकाली नदीमा सन् २०१३ मा सबैभन्दा धेरै ५ लाख ४४ हजार ४ सय ७६ क्यूसेक पुगेको थियो। 

पानीको बहाव उच्च भए पछि ९२ वर्षअघि बनेको शारदा ब्यारेज (वनबसा पुल)समेत जोखिममा परेको छ। पुलमा खतराको संकेत अनुसार रातो बत्ति बालिएको छ। 

भारतीय पक्षले हिजो साँझदेखि नै पूर्ण रुपमा पुलमा आवागमन बन्द गरेको छ। जसका कारण नेपाल–भारतको आवागमन नै ठप्प भएको छ। 

भारतमा ब्रिटिश शासन भएका बेला सन् १९२३ मा पुल निर्माण भएर १९२९ मा सम्पन्न भएको थियो। त्यही समयदेखि नै शारदा ब्यारेजले महाकाली नदीमा पानीको जलस्तर मापन गर्न सुरुआत गरेको हो। 

शारदा ब्यारेजको रेकर्ड अनुसार सन् १९६६ मा ४ लाख ३७ हजार, १९६९ मा ४ लाख ८० हजार ५९६, १९७२ मा ४ लाख ९६ हजार १००, २००८ मा ४ लाख  ६१ हजार ७८८ र २०१३ मा ५ लाख ४४ हजार ४७६ क्यूसेक मापन गरिएको थियो।

पुलको आयु सकिएकाले अहिलेको उच्च बहावले पुल नै खतरामा परेको भारतीय अधिकारीहरुले जनाएका छन्।