ताजा अपडेट
सुदूरपश्चिम प्रदेशमा प्राकृतिक विपत्तिमा परेर एक वर्षमा ८५ जनाको मृत्यु
सुदूरपश्चिम प्रदेशमा प्राकृतिक विपत्तिमा परेर एक वर्षमा ८५ जनाको मृत्यु भएको छ। सुदूरपश्चिम प्रदेश सरकारको तथ्याँक अनुसार एक वर्षमा ८५ जनाको विभिन्न विपत्तिका घटनामा परेर मृत्यु भएको हो।
सुदूरपश्चिमको आन्तरिक मामिला तथा कानून मन्त्रालयस्थित प्रदेश आपत्कालीन कार्यसञ्चालन केन्द्रका अनुसार २०७९ वैशाखदेखि २०८० असार मसान्तसम्म बाढी, पहिरो, चट्याङलगायत विपत्मा परेर सो संख्यामा मृत्यु भएको पाइएको छ।
प्राकृतिक विपत्तिमा परेर मृत्यु हुनेमा ३४ पुरुष र ५१ जना महिला छन्। त्यस्ता घटनामा परेर १०२ पुरुष र ११६ महिला गरी २१८ जना घाइते भएका छन्। पहिरोमा परेर २८, चट्याङ लागेर १४ जनाले एक वर्षमा ज्यान गुमाएका छन्।
हिमपहिरोमा परेर नौ, बाढीमा आठ, भूकम्पमा सात जनाले ज्यान गुमाएका छन्। त्यस्तै आगलागीमा छ, जनावर आतङ्कमा छ, सर्पदंशबाट चार जनाले ज्यान गुमाएका जनाइएको छ। हावाहुरी, भारी वर्षा र अन्य कारणले एक÷एक जनाले ज्यान गुमाएका छन्। पहिरोमा एक र बाढीमा नौ गरी १० जना बेपत्ता, पहिरोमा परी १७, चट्याङ लागेर ५१, हिउँपहिरोका कारण दुई, बाढीका कारण १३, भूकम्पका कारण १२ जना घाइते भएका छन्। आगलागीमा ३०, जनावरको आक्रमण ६३, सर्पदंशबाट एक, हावाहुरीका कारण ७० र भारी वर्षाका कारण ७२ जना घाइते भएका जनाइएको छ।
एक वर्षको अवधिमा प्राकृतिक विपत्तिबाट ९८२ घरपरिवार प्रभावित भएका छन्। २३२ घरमा आंशिक र २१९ घरमा पूर्ण क्षति भएको जनाइएको छ। प्राकृतिक विपत्तिका कारण ९५४ पशुचौपायाको ज्यान गएको छ।
विभिन्न प्राकृतिक विपत्का कारण एक वर्षको अवधिमा १८ करोड १६ लाख ३० हजार रुपियाँ बराबरको क्षति भएको जनाइएको छ। पीडित परिवारले सम्बन्धित जिल्ला प्रशासन कार्यालयमार्फत राहत पाइसकेको विपत् व्यवस्थापन शाखाका अधिकृत जनक धामीले बताउनुभयो। प्राकृतिक विपत्तिमा परेर ज्यान गुमाएका व्यक्तिका परिवारलाई प्रदेश विपत् व्यवस्थापन तथा राहत निर्देशिका २०७६ (पहिलो संशोधन) अनुसार राहत उपलब्ध गराउने गरिएको छ। आवास, खाद्यान्न नष्ट भएकालाई प्रतिपरिवार २० हजार, विस्थापित भई नयाँ ठाउँमा आश्रय स्थल बनाउनुपर्ने व्यवस्थाका लागि प्रतिपरिवार ५० हजार रकम उपलब्ध गराउने व्यवस्था छ।
यसै गरी प्राकृतिक विपत्तिमा परी मृत्यु भएका व्यक्तिका परिवारलाई एक लाख रुपियाँ राहत उपलब्ध गराउने व्यवस्था छ। एकै परिवारका दुई वा दुईभन्दा बढी व्यक्तिको मृत्यु भएमा थप एक लाख रुपियाँ राहत उपलब्ध गराउने गरिएको छ।
प्रतिक्रिया