Hamro Bulletin

बाजुरामा दुई वर्षअघिको बाढीपहिरोबाट विस्थापित परिवारका लागि नमुना बस्ती बनाएर हस्तान्तरण गरिएको छ । संघको ६० प्रतिशत, सुदूरपश्चिम प्रदेश सरकारको ३० प्रतिशत र जगन्नाथ गाउँपालिकाको १० प्रतिशत अनुदान लागतमा ११० घरसहितको नमुना बस्ती बनाइएको हो । 

नमुना बस्तीका लागि घर निर्माणमा ६ करोड पाँच लाख खर्च भएको जगन्नाथ गाउँपालिकाका अध्यक्ष कालीबहादुर शाहीले बताए । विस्थापितका लागि जगन्नाथ– ६ काप्डीमा बस्ती बनाइएको छ । जगन्नाथ गाउँपालिकाको समन्वयमा विस्थापितहरूले जग्गा खरिद गरेपछि त्यही जग्गामा नमुना बस्ती बनाइएको  अध्यक्ष शाहीले बताए । घरहरू जस्तापाताले छाइएको छ । 

०७९ असोजको बाढीपहिरोले घरबारविहीन भएपछि यहाँका बासिन्दा त्रिपालमा पुगेका थिए । ६ वटै वडामा क्षति गरेको थियो । दुई वर्षपछि घर पाउँदा खुसी लागेको स्थानीय सर्पलाल सार्कीले बताए । 

जगन्नाथ गाउँपालिका बिपत ब्यवस्थापन फोकल पर्सन निरेश कट्टेलका अनुसार एउटा घर निर्माणको लागत ५ लाख ५० हजार छ । यद्यपि, प्रदेश र संघ सरकारबाट आउने अनुदानको ५५ प्रतिशत मात्र निकासा भएको उनले बताए ।

संघ र प्रदेशबाट पूरै अनुदान निकासा नहुँदा  विस्थापितले पनि निर्माणमा लागेको केही रकम भुक्तानी गर्न सकेका छैनन् ।  संघ र प्रदेशबाट दोस्रो किस्ताको रकम निकासा नहुँदा घर बनाउँदा प्रयोग भएको काठ र कामदारको ज्याला उधारो रहेको सर्पलाल सार्कीले बताए । 

आधारभूत स्वास्थ्यचौकी, खानेपानीका धारा र शौचालय बन्दै 
जगन्नाथ गाउँपालिकाले नमुना बस्तीका लागि आधारभूत स्वास्थ्यचौकी, खानेपानीका धारा र शौचालय निर्माणको काम पनि अगाडि बढाएको छ ।

०८१/८२ भित्रै खानेपानी, शौचालय र स्वास्थ्यचौकी निर्माण भइसक्ने गाउँपालिका अध्यक्ष कालीबहादुर शाहीले बताए । उनका अनुसार खानेपानीका लागि ३५ लाख, शौचालयका ४६ लाख र  स्वास्थ्यचौकीका लागि १२ लाख बजेट छ । यस क्षेत्रमा आधारभूत विद्यालय भने साबिककै छ ।