ताजा अपडेट
साइपालमा बैंक खाता खोलिदिन घरदैलो
बझाङ — देशका ७५३ पालिकामध्ये सबैभन्दा ढिलो बैंक स्थापना भएको साइपाल गाउँपालिकाका बासिन्दा बैंकिङ प्रणालीमा जोडिन थालेका छन् । पालिकाको दुर्गम भेगका स्थानीयको बैंक खाता खोल्न घरदैलो कार्यक्रम सञ्चालन गरिएपछि उनीहरू बैंकिङ प्रणालीमा आबद्ध हुन थालेका हुन् ।
गत असोज ९ बाट साइपालमा सेवा थालेको एभरेस्ट बैंकले साइपाल गाउँपालिको समन्वयमा स्थानीयको आर्थिक कारोबार व्यवस्थित गर्न उत्तरी क्षेत्रका गाउँमा खाता खोलिदिन घरदैलो अभियान सञ्चालन गरेको हो । गाउँपालिका र बैंकबीच यसअघि नै सामाजिक सुरक्षा भत्ता वितरणसम्बन्धी सम्झौता भइसकेको छ । सम्झौताअनुसार पहिलो चरणमा सम्पूर्ण लाभग्राहीको खाता खोल्न थालिएको हो । फोटो खिच्ने र प्रिन्ट गर्ने उपकरणसहित घरदैलोमा गएको टोलीले उत्तरी क्षेत्रमा पर्ने जिमा, लासी, जगेरा, बलौडी र न्युना गाउँमा घरदैलो गरिरहेको छ ।
सामाजिक सुरक्षा भत्ता प्राप्त गर्ने लाभग्राहीलाई लक्ष्य गरेर सञ्चालन गरिएको अभियानमा अरू इच्छुक स्थानीयको पनि खाता खोल्ने काम भइरहेको एभरेस्ट बैंकका कर्मचारी हरीश अवस्थीले बताए । ‘कुनै ठाउँमा एक घरबाट अर्को घर पुग्न एक/डेढ घण्टा हिँड्नुपर्छ । बैंक भएको ठाउँ (धलौन) पुग्न त एकदिनै हिँड्नुपर्ने भएकाले घरमै गएर खाता खोल्ने व्यवस्था गरेका हौं,’ उनले भने । आठ दिनमा करिब नौ सय जनाको खाता खोल्ने काम भएको अवस्थीले जनाए ।
दुर्गम ठाउँमा घरमै बैंक खाता खोल्न पाउँदा खुसी लागेको स्थानीयले बताएका छन् । ‘म त अहिलेसम्म चैनपुर गएकी छैन । बैंक पनि देखेकी थिइनँ,’ बलौडी गाउँकी ७२ वर्षीया रूपादेवी बोहराले भनिन्, ‘मेरो नाममा खाता होला भनेर त सोचेकी पनि थिइनँ ।’ आफ्नो नाममा खाता हुँदा सामाजिक सुरक्षाबापतको पैसा बैंकमा सुरक्षित हुने र ब्याज पनि आउने भएकाले खुसी लागेको उनको भनाइ छ ।
घरदैलोका क्रममा खाता खोल्ने मात्र नभएर बैंकिङ शिक्षा दिने काम पनि भएको एभरेस्ट बैंक साइपाल शाखा प्रमुख रामकृष्ण थापाले बताए । वडा नम्बर ४ धुलीमा भाषाको समस्याका कारण बैंकिङ शिक्षा दिन समस्या भएको र अन्त्यमा दोभासेसमेत प्रयोग गर्नुपरेको उनले जनाए । धुलीका बासिन्दाले यहाँ मात्रै बोलिने लोपोन्मुख धुलेल भाषा र केहीले तामाङ भाषा बोल्छन् ।
सामाजिक सुरक्षा पाउने लाभग्राहीको खाता नहुँदा पालिकाका कर्मचारीले ठूलो रकम बोकेर गाउँगाउँ जानुपर्दा जोखिम हुने गरेको पालिकाका प्रमुख प्रशासकीय अधिकृत राधाकृष्ण जोशीको भनाइ छ । अब भने यस्तो समस्या नदोहोरिने उनले बताए ।
‘एकातिर रकम लुटिन्छ कि हराउँछ कि भनेर डराउनुपर्ने, अर्कोतिर हातमै नगद हुँदा लाभग्राहीको रकम पनि सुरक्षित नहुने समस्या थियो । सबैको बैंक खाता हुने र बैंकिङ कारोबार हुने भएकाले दुवै पक्षलाई राम्रो भएको छ,’ उनले भने ।
प्रतिक्रिया