नेपालको मिडिया क्षेत्रको २० अर्ब बढी लगानी जोखिममा - विज्ञापन बजार सुक्दै
सांकेतिक तस्विर

मुलुकको मिडिया क्षेत्रमा २० अर्बभन्दा बढी लगानी रहेको र पछिल्लो समय विज्ञापन बजार सुक्दै जाँदा यो क्षेत्र संकटमा परेको सरोकारवालाहरूले बताएका छन् । बुधबार काठमाडौंमा आयोजित एक कार्र्यक्रममा दिइएको जानकारीअनुसार नेपालको मिडिया क्षेत्रमा २० अर्ब रुपैयाँभन्दा बढी लगानी छ भने पछिल्लो समय यसमा लगानी थपिने क्रम जरुरी छ ।

यस्तै, नेपालमा वार्षिक १२ अर्बको विज्ञापनको कारोबार हुने मिडिया सञ्चालकहरूले बताएका छन् । यसलाई व्यवस्थित गर्न सकिए वार्षिक २५ अर्बको विज्ञापन कारोबार हुने अवस्था रहेको एभिन्यूज टेलिभिजनका अध्यक्ष भाष्करराज राजकर्णिकारले बताए ।

सञ्चार उद्यमी संगठित र व्यवस्थित हुन सके तीन वर्षभित्रमा यो लक्ष्य प्राप्त गर्ने उनको भनाइ छ । उनका अनुसार सञ्चार उद्योगलाई सेवा उद्योगको मान्यता दिनुपर्ने यसको पहिलो शर्त हो ।यसैबीच, निजी क्षेत्रका मिडिया सञ्चालकहरूले नयाँ संस्था स्थापना गरेका छन् । सञ्चार क्षेत्रमा थपिएका चुनौती तथा लगानीको संरक्षणका लागि भन्दै ‘मिडिया एलाइन्स नेपाल’ नामक संस्था स्थापना भएको छ । विभिन्न दैनिक पत्रिका तथा टेलिभिजन उद्यमीहरूको भेलाले बुधबार काठमाडौँमा पत्रकार सम्मेलन गरी उक्त संस्थाको तदर्थ समिति सार्वजनिक गरेको हो ।

‘मिडिया एलाइन्स नेपाल’को अध्यक्षमा एभिन्यूज टेलिभिजनका अध्यक्ष भाष्करराज राजकर्णिकार रहेका छन् । नौ सदस्यीय तदर्थ समितिको उपाध्यक्षमा राजधानी न्यूज पब्लिकेशन प्रालिका अध्यक्ष महेन्द्र शेरचन, माउन्टेन टेलिभिजनका अध्यक्ष राजु कँडेल छन् भने महासचिवमा इमेज च्यानल प्रालिका प्रमुख कार्यकारी अधिकृत लक्ष्मण हुमागाईँ र कोषाध्यक्षमा हिमालय टाइम्सका उज्ज्वल शर्मालाई चयन गरिएको जनाइएको छ । यस्तै, सदस्यमा जनता प्रकाशन तथा प्रसारण लिमिटेडका अध्यक्ष डा। विजय पौडेल, प्राइम टेलिभिजनका अध्यक्ष ऋषि धमला, एपीवान टेलिभिजनका प्रमुख कार्यकारी अधिकृत राजेन्द्र शाक्य र नेपाल रिपब्लिक मिडिया प्रालिका प्रमुख कार्यकारी अधिकृत समृद्धि ज्ञवाली रहेका छन् । संस्थाको सल्लाहकारमा क्या। रामेश्वर थापा र विनोदराज ज्ञवाली रहेका छन् ।

कार्यक्रममा अध्यक्ष राजकर्णिकारले मिडिया क्षेत्रको विकास र विस्तारका लागि विशुद्ध व्यावसायिक हिसाबले संस्था गठन गरिएको बताए । “लगानीकर्ताले घर बेचेर लगानी गर्ने तथा श्रमजीवी पत्रकारले जीवनभर श्रमको लगानी गर्दा पनि मिडिया क्षेत्र समृद्ध हुन सकेन,” अध्यक्ष राजकर्णिकारले भने, “त्यसकारण मिडियाको विकास र व्यवसायिकताका लागि संस्थाको स्थापना गर्नुपरेको हो ।” उनका अनुसार लामो यात्रा तय गरे पनि मिडिया उद्योग अझै व्यावसायिक बन्न सकेका छैनन् ।

सम्मेलनमा जारी गरिएको विज्ञप्तिमा सञ्चार उद्यमी र कार्यरत पत्रकार, कर्मचारी तथा कामदारको हकहित संरक्षण, मिडियामा देखापरेका समस्याको एकीकृत समाधान, तटस्थ, निष्पक्ष र जनउरदायी सूचना सम्प्रेषण तथा गुणस्तरीय समाजको निर्माणमा एलाइन्स सक्रीय हुने जनाइएको छ । संस्थामा आवद्ध हुनका लागि भने रेडियोका हकमा एक–एक हजार वाट क्षमता भएको हुनुपर्ने र टेलिभिजनका हकमा स्याटेलाइटमा गएको हुनुपर्ने छ ।

त्यस्तै पत्रिकाको हकमा राष्ट्रिय दैनिक पत्रिका हुनुपर्ने जनाइएको छ । पत्रकार सम्मेलनमार्फत मिडिया एलाइन्स नेपालले विभिन्न ३० बुँदे आफ्ना उद्देश्यहरू सार्वजनिक गर्दैे, सञ्चारसम्बन्धी नीति तथा कानून निर्माणमा सञ्चार उद्यमीको हकहित संरक्षणमा पहल गर्ने जनाइएको छ । मिडिया सञ्चालकहरूको यो दोस्रो संस्था हो । मिडिया सोसाइटी नेपाल यसअघिदेखिनै सक्रिय छ ।