Hamro Bulletin

कन्टिर–बाबू कहिलेकाहीँ बडो अलमलमा पर्छन् । के लेख्ने के नलेख्ने ? कुन विषयमा बोल्ने, कुनमा चुपचाप बस्ने । 

कन्टिर–बाबूले यति त बुझेका छन् कि सार्वजनिक महत्त्वका कुनै पनि व्यक्तिको सार्वजनिक प्रभाव पर्ने गतिविधिका बारेमा प्रतिक्रिया व्यक्त गर्नुलाई अनुचित मान्न सकिँदैन । तर कन्टिर–बाबूलाई यदाकदा समस्या कहाँनिर उत्पन्न भएजस्तो लाग्छ भने सार्वजनिक र व्यक्तिगत महत्त्वको सीमा कहाँ सुरु र कहाँ अन्त हुन्छ ? यसको उत्तर खोज्न कन्टिर–बाबूलाई बडो सकस हुन्छ ।

धेरैले हाम्रा धनशेरको पहेँली–हेली ससुराली यात्राप्रति टिप्पणी गरेका छन् । सङ्खुवासभाको मकालु गाउँपालिकास्थित ससुरालीको यात्रा धनशेरले सपत्नी हेलिकोप्टर चढेर गरे ।

कन्टिर–बाबूको प्रश्न छ– अरे यार ससुराली भनेका हाम्रा सर्वोच्च जट्टाधारीकै पालादेखि जान मन लाग्ने ठाउँ हो । सबै जान्छन्, उनी पनि गए त उनले के बिराए ? यसमा यत्रो हल्लीखली किन ? उनको व्यक्तिगत इच्छा, आकाङ्क्षा र रहरको कुनै भ्यालु छैन ?

यता धनशेरको ससुराली यात्राबारे सार्वजनिक चर्चा गर्ने, उडाउनेहरूको तर्क छ– उनी ससुराली किन गए भन्ने हाम्रो प्रश्न होइन । हामीले सार्वजनिक टिप्पणी गर्नुपर्ने कारण यति हो कि उनले कमनिस्ट चरित्र देखाएनन् । अझ भनौँ उनले कहिले लाखौँ रुपियाँको भोज गरेर, कहिले हेलिकोप्टरमा मोज गरेर कमनिस्ट चरित्रको धज्जी उडाउनुसम्म उडाए ।

बात यतिमात्र हो कि अरू पनि छ ? भन्ने कन्टिर–बाबूको जिज्ञासामा टिप्पणीकारहरू उल्टै प्रतिप्रश्न गर्छन्– उनको हेलिकोप्टर–यात्राको खर्च कहाँबाट र कसरी जुट्यो ?

जबाफमा कन्टिर–बाबू भन्छन्– अरे यार, यसमा यति माथापच्ची किन ? होला नि त उनीसँग यो खर्चको स्रोत । चिनजानका साथीभाइ । उनले भनिहाल्लान् नि यो खर्चको स्रोत के हो ? यो बेला उनले आफैंले न भने चुनावका बेला जनताले प्रश्न त सोध्छन् नै ।

यसमा पत्रकारहरूको चाल देखेर पनि कन्टिर–बाबू छक्क पर्छन् । धनशेरजीको हेली चढ्ने स्रोत के हो ? त्यस्तो हैसियत कसरी बन्यो ? खोजेर केही लेख्नु–ओर्नु छैन । खाली हेली चढ्यो भन्यो, भइहाल्यो ?

रह्यो कमनिस्ट चरित्रको कुरो, यसमा पनि हाय–तौबा गर्नुपर्ने कुनै कारण छ जस्तो कन्टिर–बाबूलाई लाग्दैन । कन्टिर–बाबूलाई यिनको ढोँगको पराकाष्ठाबारे कुनै सन्देह छैन । नेपालका अहिलेका कुनचाहिँ नाम चलेका कमनिष्ट नेताको चरित्र असली कमनिष्टजस्तो छ र हामीले धनशेरजी नक्कली कमनिस्ट भए भनेर भन्ने ?

कन्टिर–बाबू त भन्छन्– एक–सुता पनि टेन्सन नलिनुहोला धनशेरजी । भन्नेले भनिरहन्छन्, विरोध गर्नेले गरिरहन्छन् । भगवान् शिवलाई त ससुराली प्रिय थियो भन्छन्, हाम्रो धनशेरजीलाई पनि भयो त के बिग्रियो ?

लगे रहो धनशेर भाइ !

कोसी अनलाईन बाट धर्मेन्द्र झा को स्तम्भ