Hamro Bulletin

अछाम – लामो समयदेखि एच. एल. एच. H.L.H (लाखमा एक जनालाई हुने) रोगसँग जुध्दै आएका साँफेबगर नगरपालिका वडा नं १० का दीर्घराज भाट यतिबेला काठमाडौँको नयाँबानेश्वर स्थिति सिभिल अस्पतालमा उपचाररत छन् ।

अस्पतालको ३०१ नम्बर बेडमा उपचार गराइरहेका ४२ वर्षीय भाटलाई अस्पतालका डाक्टर विशेष पौडेलले निको पारिछाड्ने प्रतिबद्धता जनाए पनि आर्थिक संकटमा उनको उपचार सम्भव देखिएको छैन । डाक्टरको आश्वासनले बाँचिने आस गरेका भाटका अगाडि आर्थिक सङ्कलन गर्नुपर्ने बाध्यात्मक अवस्था छ ।

धेरै ज्वरो आएपछि गत जेठमा उपचारका लागि धनगढीको एक अस्पताल पुगेका उनमा डाक्टरले जण्डिस बिग्रिएको भनेर जानकारी गराएका थिए । धनगढीमा उपचार सफल हुन नसकेपछि काठमाडौँ आउनु अगाडि नेपालगञ्ज अस्पतालले क्यान्सरको आशंका गरेपनि क्यान्सर हो या होइन भन्ने पुष्टि गरेको छैन । उनी उपचार पाउने आसमा सहयोगी मनहरूसँग आर्थिक सहायताको अपेक्षा गरिरहेका छन् ।

यतिबेला भाटको फियोको साइज पनि केही बढेको र सेता रक्तकोषको संख्या पनि कम रहेको डाक्टरले बताएका छन् । साथै उनको शरिरमा रोग प्रतिरोधात्मक क्षमता पनि कमजोर रहेको बताइएको छ । भाटलाई नियमित रुपमा  रगत आवश्यक हुने हुँदा सम्भव हुने जो कोही O+ रक्त दान गरेर पनि उनलाई ठुलो सहयोग गर्न सकिने छ ।

उपचारमा यति नै खर्च लाग्छ भनेर यकिन नभएको उनको हेरबिचारमा तल्लीन रहेकी उनकी श्रीमतीले बताइन् । देउडा गायनमा रुचि राख्ने भाटले २०५२ सालमा एउटा देउडाको गिति एल्बम समेत बजारमा ल्याएका थिए ।भाटलाई सहयोग गर्न चाहने सहयोगी मनहरूले ग्लोबल आईएमई बैंकमा रहेको दीर्घराज भाटको व्यक्तिगत खाता नं. J९०७०१००००७५९  (J907010000759) मा आर्थिक सहयोग गर्न सक्नुहुनेछ । थप जानकारी र सम्पर्कका लागि बिष्णु भट्ट ९८४१०३४७६५ सम्पर्क गर्न सक्नु हुनेछ । दियालोपोष्ट