Hamro Bulletin

बैतडी । बैतडीको मेलौलीमा सोमबार भएको बस दुर्घटना परी घाइते भएका मध्ये ६ जनाको धनगढीमा उपचार भइरहेको छ । चालकसहित ६ जनाको धनगढीमा उपचार भइरहेको जिल्ला प्रहरी कार्यालय बैतडीका प्रवक्ता प्रहरी निरीक्षक योगेश खत्रीले बताए । 

यस्तै १४ जनाको डडेल्धुरा अस्पतालमा उपचार भइरहेको छ भने २५ जना डडेल्धुरा अस्पतालबाट उपचारपछि डिस्चार्ज भइसकेका प्रहरी निरीक्षक खत्रीले बताए । बसमा चालकसहित ४६ जना सवार रहेको पुष्टि भएको उनले बताए । 

पञ्चेश्वरबाट महेन्द्रनगरका लागि छुटेको पवनदुत यातायातको लु २ ख २०११ नम्बरको बस सोमबार दिउँसो मेलौली–पञ्चेश्वर सडकखण्ड अन्तर्गत मेलौली नगरपालिका ७ स्वाखानीमा दुर्घटनामा परेको थियो । दुर्घटनामा परेर पञ्चेश्वर गाउँपालिका ६ रन्तोलीका २८ बर्षीय उमेश भण्डारीको मृत्यु भएको छ । 

दुर्घटनामा परेर ४५ जना घाइते भएका छन् । घाइते मध्ये उपचार गराइरहेका सबैको अवस्था अहिले मध्यम रहेको प्रहरीले जनाएको छ । कच्ची सडकमा बस अनियन्त्रित भएर दुर्घटना भएको प्रहरीको प्रारम्भिक अनुमान छ । 

सडकबाट ५० मिटर तल खसेको बस रुखमा अड्केका कारण ठूलो मानवीय क्षति हुनबाट जोगिएको प्रहरीले जनाएको छ ।