Hamro Bulletin

बैतडी ।  बैतडीमा महिला तथा बालबालिका हराउने क्रम रोकिएको छैन् । हरेक बर्ष हराउने महिला तथा बालबालिकाकोे संख्या बढ्दै गएको प्रहरीको तथ्यांकले देखाएको छ । 

जिल्ला प्रहरी कार्यालयको तथ्यांक अनुुसार आर्थिक बर्ष २०७८/७९ मा ७८ जना हराएकोमा गत आर्थिक बर्षमा त्यो संख्या बढेर १०५ पुगेको छ । हराउनेमा सबैभन्दा बढी महिला रहेका जिल्ला प्रहरी कार्यालयका प्रवक्ता प्रहरी निरीक्षक लोकराज जोशीले बताए । 

गत आर्थिक बर्षमा १०५ जनाको खोजीका लागि प्रहरीमा निवेदन आएकोमा ५५ जना फेला परेका उनले बताए । गत बर्ष ७२ जना महिला, २१ बालिका, १० बालक र २ जेष्ठ नागरिक हराएका थिए । हराएका मध्ये ३३ महिला, १२ बालिका, ९ बालक र एकजना जेष्ठ नागरिक फेला परेका प्रहरी निरीक्षक जोशीले बताए । 

यस्तै आर्थिक बर्ष २०७८/७९ मा ४० जना महिला, २६ बालिका र १२ बालक हराएका थिए । ती मध्ये २३ महिला, १६ बालिका र ६ बालक मात्रै फेला परेका छन् । दुई बर्षको अवधिमा हराएका मध्ये एकसय जना फेला परेका छन् भने ८३ जना अझै हराइरहेका प्रहरी निरीक्षक जोशीले बताए । 

आफन्तहरुले खोजीकार्यका लागि भन्दै प्रहरीमा दिएको निवेदनका आधारमा हराएका महिला तथा बालबालिकाको संख्या एकीन गर्ने गरिएको प्रहरीले जनाएको छ । प्रहरीमा आएको निवेदनका आधारमा हराएकाहरुको खोजी कार्य र फ्लोअप गर्ने कार्य जारी रहेको प्रहरी निरीक्षक जोशीले बताए । 

खुला सीमा नाकाका कारण धेरैजसो महिला तथा बालबालिकाहरु भारततिर गएको हुन सक्ने बताइएको छ । धेरै जसो भागेर भारत जाने र उतै काम गर्ने भएकाले उनीहरुको फेला नपर्ने अवस्था रहेको प्रहरीको भनाइ छ । 

हराएको बेला प्रहरीलाई खोजीका लागि निवेदन दिएपनि हराएको मान्छे फेला परेपछि प्रहरी जानकारी नदिने परीपाटी रहेकाले पनि हराएकाहरुको संख्या बढी भएको हुन सक्ने अनुमान गरिएको छ ।