Hamro Bulletin

काठमाण्डौं । सरकारले पुँजीगत खर्च बढाउन नसकेको आलोचना भइरहेका बेला निर्माण व्यवसायीले गरेको कामको भुक्तानी पनि दिन सकेको छैन । गत आवमा काम गरेर पनि भुक्तानी पाउन नसकेको भन्दै निर्माण व्यवसायी चरणबद्ध आन्दोलनमा उत्रिएका छन् ।

त्यसैक्रममा सोमबार प्रधानमन्त्री निवास अगाडि व्यवसायीहरुले व्यानर बोकेर विरोधमा उत्रिएका छन् । नेपाल निर्माण व्यवसायी महासंघले देशभरका व्यवसायीलाई बोलाएर प्रधानमन्त्री निवास बालुवाटार अगाडि प्रदर्शन गरेको हो । व्यवसायीहरुले निवास अगाडि एक घण्टा धर्ना दिएका थिए ।

गत वर्ष आयोजनाको काम सम्पन्न गरेको बिल भौचर पेस गर्दा पनि सरकारी कार्यालयहरुले भुक्तानी नदिएको भन्दै निर्माण व्यवसायीहरूले प्रधानमन्त्री पुष्पकमल दाहालको ध्यानाकर्षण गराउन खोजेका थिए ।

धर्नामा सहभागीहरूले काम गरेबापतको रकम तुरुन्त भुक्तानी गर, सम्पूर्ण ठेक्काको एकमुष्ट म्याद थप गर, जुनसुकै अवधिको ठेक्काको मूल्य समायोजन गर, बीमा निर्देशिका २०७८ खारेज गर, उपभोक्ता समितिबाट निर्माण कार्य गर्ने नियम खारेज गर, सार्वजनिक खरिद ऐन तथा नियमावली तुरुन्त संशोधन गर लगायतका नारा लेखिएका प्लेकार्ड प्रदर्शन गरेका थिए ।

व्यवसायीहरुले प्रर्दशन गरेका नाराहरुले रकम भुक्तानीसँगै अन्य विषयहरु पनि जोडिएको देखिएको छ ।
व्यवसायीहरुका अनुसार मुख्य माग भने रकम भुक्तानीकै हो । अहिले सम्म निर्माण व्यवसायीले काम गरेर भुक्तानी पाउन बाँकी रकम ४० अर्ब रुपैयाँ भन्दा बढी छ ।

निर्माण व्यवसायीहरुको सोमबारको अर्को कार्यक्रम संसद भवन अगाडि प्रदर्शन गर्ने रहेको छ । व्यवसायीहरुले आइतबार सार्वजनिक खरिद अनुगमन कार्यलयमा धर्ना दिएका थिए । महासंघले केही दिन अघि पत्रकार सम्मेलन गरी विरोधको कार्यक्रम तय गरेको थियो । त्यही तय गरिएको कार्यक्रम अनुसार दैनिक विरोधका कार्यक्रम भइरहेको छ ।