Hamro Bulletin

कन्टिर–बाबू बिहानैदेखि फतफताउँदै थिए, फेरि त्यही रामाखटोला … फेरि दिनभरि त्यही पाउडर । कति भन्नु, कति लेख्नु ? बेइमानहरूको कानमा जुम्रा घिस्रिए पो !

त्यसो त कन्टिर–बाबूको यो फतफत्याइ त्यत्तिकै फाउमा आएको होइन, सम्बन्धित सरोकारवालाको हेलचक्र्याइँले पीडित र क्षुब्ध भएर उत्पन्न आक्रोशको पछिल्लो परिणाम हो ।

बुझ्नु भएन ? अरे यार त्यही फ्रीबाला पाउडरको बात गरेका हुन् कन्टिर–बाबूले । विराटनगरदेखि इटहरीसम्मको जनजीवन पूरै प्रभावित पारिरहेको त्यो फ्रीवाला पाउडर देखेर विगत लामो समयदेखि परेसान छन् उनी ।

सडक बनाउने नाममा जथाभावी उडेको र उडाइएको धुलोले यस क्षेत्रका मानिसको बिजोक भएको धेरै भइसक्यो । बिहानदेखि बेलुकासम्म सास फेर्नै गाह्रो हुनेगरी धुलो उडेको छ, उडेको छ । रोक्ने वाला, जनताको स्वास्थ्यको परवाह गर्ने वाला कोही देखिँदैन ।

कन्टिर–बाबूलाई थाहा छ– उनीहरू कालो सिसा लगाउँदै, बाटो खाली गर् आयो तेरो सर बोलको गीत सुन्दै, अगाडि–पछाडि साइरन बजाउँदै हिँड्छन् । सडकको धुलोले पूरै जिउ छाप्दा कस्तो अनुभव हुन्छ के थाहा तिनलाई ? अपना काम बनता, भाँड में जाए जनता !

विकासका नाममा, नयाँ संरचना बनाउने नाममा जनस्वास्थ्यसँग भइरहेको यो खेलवाड कन्टिर–बाबूलाई एक सुता मन परेको छैन । कन्टिर–बाबू चस्माको डाँडी मिलाउँदै सोचिरहेका छन्– नेपालमा करोडौँको सडक ठेक्का लिने ठेकेदार छन्, दिने कमिसनखोर र बिचौलियाहरू पनि थुप्रै छन् । तर करोडौँको काम गर्ने भनिएका ठेकेदारहरूसँग जाबो एउटा ब्रुमर गाडी पनि छैन । यसबाट के बुझिन्छ ?

कन्टिर–बाबूलाई लाग्छ– यसबाट दुइटा कुरा बुझिन्छ । पहिलो ठेक्का लिने–दिने चाहे जो होस्, उनीहरू जनताको स्वास्थ्यप्रति फिटिक्कै संवेदनशील छैनन् । दोस्रो नेपालमा ठेकेदारको योग्यता, ऊसँग भएका उपकरण र जनशक्तिले होइन, नातागोता, कमिसन, पार्टीगत संलग्नता आदि–इत्यादिले निर्धारण गर्छ । सम्भवतः त्यसैको प्रतिविम्व सडकमा जनतालाई वितरित फ्रीवाला पाउडरमार्फत प्रदर्शित भइरहेको छ ।

कन्टिर–बाबूको प्रश्न छ– यसरी निर्धक्क निरिह जनतालाई सबैभन्दा खराब असर गर्ने निःशुल्क धुलो खान कहिलेसम्म बाध्य पार्ने ? सरोकारवालासँग यसको उत्तर छ ? कन्टिर–बाबू खोजीमा छन्, उनको प्रश्नको इमानदार उत्तर दिने छ कोही माइकलाल ?

यस सन्दर्भमा कन्टिर–बाबू मत्थामा हात राखेर गीत गुनगुनाउन बाध्य छन्– ६ लेनको सडकमा बसन्ती गुडाउँदै … बाइरोडको बाटोमा धूलो उडाउँदै … टिङ–टिङ !

कोसी अनलाईन बाट धर्मेन्द्र झा को स्तम्भ