Hamro Bulletin

 ८ फागुन । नेपालमा आयात हुने तरकारी तथा फलफूलमा जीवनाशक विषादीको मात्रा कम देखिएको छ । खाद्य प्रविधि तथा गुण नियन्त्रण विभागले कात्तिकदेखि विभिन्न कार्यालयबाट गरेको विषादीको अवशेष परीक्षणमा यस्तो देखिएको हो । विभागले कात्तिक १ देखि काँकडभिट्टा, विराटनगर, जलेश्वर, वीरगञ्ज, भैरहवा, नेपालगञ्ज, धनगढीका नाकामा प्रयोगशाला स्थापना गरी भारतबाट ल्याइएका तरकारी तथा फलफूलमा जीवनाशक विषादीको द्रुत परीक्षण गर्दैआएको छ । 

सो अवधिमा १८ हजार ८ सय २६ वटा फलफूल तथा तरकारीको मात्रै नमूना परिक्षण गरेको छ । उक्त नमूना परिक्षण गर्दा जुनार, केरा, चुकन्दर, चिकु तथा आलूका ९ वटा नमूना पहेंलो जोन (केहि समय होल्ड) को पाइएको थियो भने ६ वटा नमूना रेड जोन (होल्ड) मा रहेको पाइएको थियो । 

तरकारीको विषादीमा ३५ प्रतिशतसम्म इनिमेसन रेटलाई हरियो, ३५ देखि ४५ प्रतिशतलाई पहेँलो र ४५ भन्दा माथिलाई रातो नम्बरको संकेत समेत दिइएको छ । विषादीको मात्रा ३५ प्रतिशत इनिमेसन रेट भन्दा बढी हुनु हुँदैन । ४५ प्रतिशतसम्म इनिमेसन रेट भएका खाद्यवस्तु खान अयोग्य मानिए पनि केही समय भण्डारणमा राखी इनिमेसन रेट कम गरी खान मिल्छ । ४५ प्रतिशतभन्दा माथि इनिमेसन रेट भएका खाद्यवस्तु भने पूर्णत अखाद्य मानिन्छ ।
 
यसअघि आयातित तरकारी तथा फलफूल केन्द्रीय कृषि प्रयोगशालाबाट मात्रै परीक्षण हुन्थ्यो । पछिल्लो समय खाद्यले पनि परीक्षण गरिरहेको छ। आयातित तरकारी सबैभन्दा धेरै कालिमाटी फलफूल तथा तरकारी बजारमा भित्रिन्छ । तर, आयातित तरकारीमा विषादीको मात्रा प्रभावकारी रुपमा परीक्षण हुने गरेको छैन ।

विभागका महानिर्देशक डा.मतिना जोशी वैद्यका अनुसार हाल दुईवटा समूह  (कार्बामेट र ओर्गानोफोस्फेट) विषादी भए९नभएको मात्रै परीक्षण हुने गरेको छ । अब ४ समूहको विषादी भए नभएको परिक्षण गर्ने तयारी गरिरहेको जानकारी दिँदै उनले नाकामा सबै तरकारी रोकेर विषादी परीक्षण गर्न सम्भव नभएको पनि बताइन् । 

 ‘तरकारी बाटोमा रोकेर काठमाडौं आउनुपर्यो, यहाँ परीक्षण गरी रिपोर्ट लिएर जाँदा केही दिन लाग्छ, जसले तरकारी बिग्रने समस्या हुन्छ’ उनले भनिन् । 

‘६ महिनामा मात्र २२ अर्ब ५१ करोडको तरकारी आयात’
विषादी जाँच कमै भएपनि हरियो तरकारीमा परनिर्भरता बढ्दै गएको छ । चालू आर्थिक वर्षको ६ महिनामा मात्र २२ अर्ब ५१ करोड ५८ लाख ७१ हजार मूल्यको हरियो तरकारी आयात भएको छ । गत वर्ष सोही अवधिमा हरियो तरकारीजन्य वस्तुको आयात १९ अर्ब २२ करोड ३९ लाख ९२ हजार मूल्यको आयात भएको थियो ।

यसरी हेर्दा कृषि प्रधान देश नेपालमा कृषिजजन्य वस्तु आयातको ग्राफ बढ्दोक्रममा रहेको देख्न सक्छौं । खासगरी हरिया तरकारीमा ताजा टमाटर, प्याज, लसुन, काउली, बन्दा, गाँजर, मोटरकोसा, भान्टा, ताजा गेडागुडी, कुरिलो, फर्सीलगायतका विभिन्न प्रकारका तरकारी आयात भएका हुन् । बन्दा र काउली जस्ता हरिया तरकारीका साथै प्याज, लसुन र टमाटरको आयात बढ्दो छ ।