ताजा अपडेट
बुढीगंगा नदीमा ठूलो बाढी, स्थानीय त्रसित
गीता कुँवर अछाम :
लगातारको अविरल वर्षाका कारण बुढीगंगा नदीमा बाढी आएको छ । बाढीले साँफेबगर नगरपालिका आसपासको खेतीयोग्य जमिन समेत कटान गर्न थालेको छ। साँफेबगर नगरपालिका -४ मष्टामाण्डौ पक्की पुल छेउछाउमा करिब ३ सय मिटर खेतीयोग्य जमिन कटान गरिसकेको छ । मष्टामाण्डौंमा रहेका नगरपालिकाको कार्यालय, एयरपोर्ट र बजार समेत उच्च जोखिममा रहेको वडाध्यक्ष बालगिरी कुँवरले बताए ।
छेकवारका लागि तारजाली हाल्ने काम भएको उनले बताए । पानीको वहाब बढेसँगै नदी आसपासका स्थानीय त्रसित भएका छन् । नदीमा बाढी आएसँगै रातभरी जागराम बस्ने गरेको स्थानीय दिपक खड्काले बताए ।
उनले भने, 'रातभरी सुत्न नपाएको हप्ता दिन भइसक्यो । वर्षाका त्रासमा बाच्नुपरेको छ। गुरु योजना बनाउँछौ भनेको सुनेको जर्षौं बित्यो तर अहिलेसम्म केही हुन सकेको छैन । तारजालीका लागि करोडौं रकम आउने गरेको सुन्नमा आए पनि कहाँ जान्छ हामीलाई थाहा नै हुँदैन,नदी किनारका ४० घर उच्च जोखिममा छन् ।'
पूर्वबाट छिपेखोला,पश्चिमबाट प्रभालीगाड र उत्तरबाट बग्ने बुढीगंगाका कारण साफेबगर जोखिममा परेको हो।जिल्लामा भइरहेका विकास निर्माणका कामका लागि नदी छेउछाउबाट अनियन्त्रित रुपले ढुंगा, गिट्टी, बालुवा निकाल्दा कटानको जोखिम बढेको हो ।
साँफेबगर नगरपालिकाले बुढीगंगा नदी र छिपेखोलाबाट वर्षैपिच्छे लाखौंको राजश्व संकलन गर्दै आएको छ तर पनि नदी नियन्त्रणका लागि कुनै प्रयास नभएको स्थानीयको गुनासो छ ।
यस विषयमा यहाँका नागरिकले पटकपटक स्थानीय सरकार, प्रदेश सरकार र केन्द्र सरकारलाई जानकारी गराइरहँदा पनि नदी नियन्त्रण तथा तटबन्धका लागि कसैले पनि दिर्घकालिन योजना बनाउन नसकेको स्थानीयको गुनासो छ । अन्नपूर्ण
प्रतिक्रिया