Hamro Bulletin

सन् २०२३ मा हरेक दिन औसत १४० महिला र केटीहरू आफ्नै घनिष्ठ साथी वा नजिकको नातेदारबाट मारिएको खुलासा भएको छ । लैंगिक हिंसासम्बन्धी संयुक्त राष्ट्रसंघको प्रतिवेदनले सोमबार उक्त जानकारी दिएको हो ।

प्रतिवेदनअनुसार गत वर्ष करिब ८५ हजार महिला तथा किशोरीको हत्या भएको थियो । महिला र किशोरी चौतर्फी रूपमा हिंसाबाट ग्रसित छन् । ‘जताततै लैंगिक हिंसाको चरम रूपबाट महिला प्रभावित भइरहेका छन्,’ प्रतिवेदनमा भनिएको छ, ‘महिला र केटीहरूका लागि घर सबैभन्दा खतरनाक ठाउँ हो ।’ गत वर्ष करिब ६० प्रतिशत अर्थात् ५१ हजारभन्दा बढी महिला तथा किशोरीको मृत्यु आफ्नो पार्टनर वा नातेदारको हातबाट भएको प्रतिवेदनमा उल्लेख छ ।

यो भनेको हरेक दिन १४० जना वा प्रत्येक १० मिनेटमा एकजना महिलाको हत्या हुनुबराबर हो । प्रतिवेदनमा भनिएको छ, ‘यो महिला र किशोरीका लागि घातक हो ।’ अफ्रिकामा सन् २०२३ मा २१ हजार ७०० महिलाको मृत्यु भएको थियो ।

सबैभन्दा कम महिला हत्यादर युरोप र एसियामा छ । केही देशमा हिंसा रोक्न प्रयास गरिए पनि लैंगिक असमानता र रुढिवादले नारीहत्याको संख्या बढेको छ । यसविपरीत अधिकांश पुरुषको हत्या घरबाहिर हुन्छ । प्रतिवेदनमा भनिएको छ– देशहरूले महिला र बालिकाको हत्या रोक्न प्रयास गरे पनि सफल हुन सकेको छैन ।